၀၃၀၇ စစ်ဆင်ရေး - ကချင်ပြည်နယ်၏ နည်းစနစ်ကျသည့် နိုင်ငံရေးအပြောင်းအရွေ့တစ်ခု

ပါဂျောင်မီဒီယာ

၁၉ရက်၊ ဧပြီလ၊ ၂၀၂၄ ခုနှစ်။

မတ်လ (၇)ရက်နေ့ကို အစွဲပြုပြီး ကချင်လွတ်မြောက်ရေး တပ်မတော် (KIA) နှင့် မဟာမိတ် အဖွဲ့များမှ (၀၃၀၇)ဟု အမည်ပေးထားသည့် သိသာထင်ရှားသော စစ်ရေးလှုပ်ရှားမှုတစ်ခုကို မတ်လ (၇)ရက်နေ့ ၂၀၂၄ ခုနှစ်တွင် စတင်ခဲ့ပြီးလက်ရှိအချိန်ထိ အကောင်အထည်ဖော် ဆောင်ရွက်နေဆဲဖြစ်သည်။ ယခု စစ်ဆင်ရေးသည် စစ်ကောင်စီတပ်ဖွဲ့နှင့် ကချင်လွတ်မြောက်ရေး တပ်မတော် (KIA) နှင့် မဟာမိတ် အဖွဲ့များ အကြား ဖြစ်ပွားနေသော ပဋိပက္ခတွင် အဓိက အခိုက်အတန့် ဖြစ်သည်။ ဤဖြစ်ရပ်များကို ဖြန့်ကြက်ကြည့်လျှင် ပိုမိုပြင်းထန်လာသော စစ်ရေးလှုပ်ရှားမှုများကို သာမက ဒေသတွင်းကို ပုံဖော်သည့် အနုစိတ်သော နိုင်ငံရေးလှုပ်ရှားမှုများကို မီးမောင်းထိုးပြနေသည်ကို မြင်တွေ့ရသည်။

KIA နှင့် ၎င်း၏ မဟာမိတ်များ သိသိသာသာ အမြတ်အစွန်းများရရှိခဲ့သလို တစ်ဖက်မှာလဲ စစ်ကောင်စီ တပ်ဖွဲ့များ ပြင်းထန်စွာ ဆုံးရှုံးခဲ့ကြောင်း မြေပြင်သတင်းများအရ သိရသည်။ တရုတ်နိုင်ငံနှင့် အဓိကနယ်စပ်မြို့ဖြစ်သည့် လိုင်ဇာတဝိုက်ရှိ စစ်ကောင်စီ စခန်း ၆၀ ကျော်အားသိမ်းပိုက်နိုင်ခဲ့ပြီး ကချင်လွတ်မြောက်ရေးအဖွဲ့ KIO/KIA ဌာနချုပ်ကိုလည်း ထိထိရောက်ရောက် ထိန်းချုပ်ထားနိုင်ခဲ့သည်။ အဆိုပါ ထိုးစစ်ကြောင့် ပြည်နယ်တစ်ဝှမ်းရှိ စစ်ကောင်စီ၏ စစ်အခြေစိုက်စခန်းများ ဆုတ်ခွာခဲ့ရသလို တစ်ဖက်မှာလည်း စစ်ရှောင်နေရာရွှေ့ပြောင်းရေး အကျပ်အတည်းကို ဖြစ်ပေါ်စေခဲ့ပြီး အိုးမဲ့အိမ်မဲ့ အသစ်ဝင်ရောက်လာသူ စစ်ပြေးရှောင် ၂၀,၀၀၀ ခန့်သည် ဆိုးရွားလှသော လူသားချင်းစာနာမှုဆိုင်ရာ အခြေအနေများနှင့် ရင်ဆိုင်နေရသည်။

ပါဂျောင်မီဒီယာမှ အဓိကပုဂ္ဂိုလ်များနှင့် အင်တာဗျူးများ ပြုလုပ်ခဲ့ရာတွင် ယင်းပုဂ္ဂိုလ်များမှ 0307 စစ်ဆင်ရေး၏ ဗျူဟာမြောက်အထောက်အပံ့များကို အောက်ပါအတိုင်း မီးမောင်းထိုးပြခဲ့ကြသည်။ “စစ်ကောင်စီ နဲ့ ပဋိပက္ခမှာ ဆယ်စုနှစ်များစွာ အတွေ့အကြုံရှိထားတဲ့ KIA က ဒီထိုးစစ်အတွက် သေသေချာချာ ပြင်ဆင်ထားတာကို တွေ့ရတယ်” ဟု အင်တာဗျူးဖြေကြားသူ တစ်ယောက်က ဆိုသည်။ "မကြာသေးမီက ရှမ်းပြည်နယ်က ညီနောင်သုံးဖော်မဟာမိတ်အဖွဲ့ရဲ့ '၁၀၂၇' စစ်ဆင်ရေး အောင်မြင်မှုက လှုံ့ဆော်မှုအားတစ်ခု ဖြစ်စေခဲ့သလို စစ်ကောင်စီကို ဆန့်ကျင်ပြီး နယ်မြေပြန်လည်ရယူနိုင်တယ့် အလားအလာတွေကို သိသိသာသာ ပြသနေတာပေါ့" ဟု အခြားတစ်ဦးမှ ပြန်လည်ဖြေကြားခဲ့သည်။

“၀၃၀၇ စစ်ဆင်ရေးမှာ KIA နဲ့ မဟာမိတ်တွေရဲ့ ရည်ရွယ်ချက်တွေက ဘက်စုံရှိပါတယ်။ အဓိကကတော့ ကချင်ပြည်နယ်မှာ နယ်မြေတွေ ပြန်လည်ရရှိဖို့၊ SAC ဖိနှိပ်မှုတွေကနေ ရပ်ရွာလူထုကို ခုခံကာကွယ်ဖို့နဲ့ SAC ထိန်းချုပ်မှု အားနည်းသွားအောင် ရည်ရွယ်ပါတယ်။ ဤပန်းတိုင်တွေကို အောင်မြင်စွာရရှိဖို့ မီးမောင်းထိုးပြနေတာက အရေးပါတဲ့နေရာတွေကို ဗျူဟာမြောက်သိမ်းပိုက်ခြင်းပါပဲ” ဟု အင်တာဗျူးဖြေဆိုသူမှ အလေးပေးပြောကြားခဲ့ပြီး လက်ရှိစစ်ဆင်ရေးတွင် ၎င်းတို့၏ရည်မှန်းချက်များ ကျယ်ကျယ်ပြန့်ပြန့်သဘောသဘာဝကို မီးမောင်းထိုးပြခဲ့သည်။

“ဒီတိုက်ပွဲမှာ စစ်ကောင်စီ တပ်ဖွဲ့တွေရဲ့ ဆုံးရှုံးမှုဟာ အဓိက အချက်ပေါင်းများစွာနဲ့ သက်ဆိုင်ပါတယ်။ ပထမအချက်က KIA က စစ်မြေပြင်မှာ သူတို့ရဲ့ စိတ်ဓာတ်နဲ့ သန္နိဋ္ဌာန်ကို မြှင့်တင်ပေးတဲ့ ခိုင်မာတဲ့ စိတ်ဓာတ်နဲ့ လူထုရဲ့ ပံ့ပိုးမှုရှိတယ်။ စစ်ကောင်စီ တပ်ဖွဲ့များထက် သိသာထင်ရှားတဲ့ အားသာချက်တစ်ခုရှိတာပေါ့။ ဒါ့အပြင် KIA ဘက်က မဟာဗျူဟာကျကျ စစ်ကောင်စီ စစ်ကူများရဲ့ အဓိကလမ်းကြောင်းတွေကို ထိထိရောက်ရောက် ပိတ်ဆို့ထားနိုင်တယ်။ အဲ့ဒီ ဗျူဟာမြောက် အချက်များကို ထိန်းချုပ်ထားနိုင်ခြင်းက စစ်ကောင်စီရဲ့ တပ်အင်အား ပြန်လည် ဖြည့်တင်းဖို့နှင့် ထောက်ပံ့နိုင်စွမ်းကို ကန့်သတ်ထားနိုင်တာပေါ့။ အဲ့ဒါအပြင် မကြာသေးမှီက မြောက်ပိုင်းညီနောင်မဟာမိတ်အဖွဲ့များရဲ့ ၁၀၂၇ စစ်ဆင်ရေးအောင်မြင်မှုက တရုတ်ရဲ့ ဝင်ရောက်စွက်ဖက်မှုကြောင့် အရှိန်အဟုန်ရပ်တန့်သွားတယ်။ တစ်ဖက်မှာလည်း မကြာသေးမီက တရုတ်အာဏာပိုင်များ နှင့် စစ်ကောင်စီရဲ့ တွေ့ဆုံဆွေးနွေးမှုကလည်း KIA ရဲ့ စစ်အဟုန် တိုးတက်မှုကို အဟန့်အတား ဖြစ်စေခဲ့တယ်။ ဒီစိန်ခေါ်မှုတွေကြားထဲမှာ KIA က သူတို့ရဲ့ အောင်ပွဲခံထိုးစစ်အရှိန်ကို ဘယ်လိုအံ့သြစရာ ဆက်ထိန်းသွားမလဲဆိုတာကို ကိုယ်ကိုယ်တိုင်တွေ့မြင်ရမှာတော့ စိတ်ဝင်စားစရာပဲ” ဟု အင်တာဗျူးဖြေဆိုသူတစ်ဦးက ကချင်ပြည်နယ်တွင် လက်ရှိဖြစ်ပေါ်နေသော ပဋိပက္ခကို ပုံဖော်နေသည့် ရွေ့လျားပြောင်းလဲနေသော အသွင်အပြင်နှင့် ပြင်ပသြဇာများကို ပြတ်ပြတ်သားသား အလေးပေးဖော်ပြခဲ့သည်။

သိသာထင်ရှားသည်မှာ စိန်လုံ ကဲ့သို့သော ဗျူဟာမြောက် အခြေစိုက်စခန်းများကို သိမ်းပိုက်ပြီး နယ်စပ်မြို့ လွယ်ဂျယ်ဘက်သို့ ချီတက်ခြင်းသည် ဗန်းမော်ရှိ စစ်ကောင်စီ၏ အမာခံနယ်မြေများကို ပိုမိုဖိအားပေးရန်အတွက် KIA ဘက်မှ နေရာယူထားခြင်းဖြစ်သည်။ “ကချင်နဲ့ရှမ်းပြည်နယ်နှစ်ခုစလုံးမှာရှိတဲ့ အရေးကြီးတဲ့ ထောက်ပံ့ရေးလမ်းကြောင်းတွေနဲ့ နယ်စပ်မြို့တွေကို ထိန်းချုပ်နိုင်မှုနဲ့အတူ တိုင်းရင်းသား လက်နက်ကိုင်အဖွဲ့အစည်း (EAO) တွေဟာ ဒေသတွင်း နိုင်ငံရေးအခင်းအကျင်းမှာ အဓိကကျတဲ့ အခန်းကဏ္ဍကနေ ပေါ်ထွက်လာပါတယ်” ဟု တွေ့ဆုံဖြေကြားသူတစ်ဦးက မှတ်ချက်ပြုခဲ့သည်။

ထို့အပြင် KIA သည် စစ်ကောင်စီ တပ်ဖွဲ့များကို ကချင်ပြည်နယ်မှ တိုက်ထုတ်ရန် စီစဉ်ထားပြီး စစ်ကောင်စီ နှင့် ညှိနှိုင်းမည်မဟုတ်ကြောင်း ထင်ရှားစွာတွေ့ရသည်။ “၀၃၀၇ စစ်ဆင်ရေးမှာ ကျွန်တော်တို့ရဲ့ အဓိက ရည်မှန်းချက်ကတော့ ကချင်လူမျိုးများရဲ့ နယ်မြေတွေကို ပြန်လည်ရယူဖို့နှင့် စစ်ကောင်စီရဲ့ဖိနှိပ်မှုအောက်မှ ကျွန်ုတော်တို့ရဲ့ လူမှုအသိုင်းအဝိုင်းကို ခုခံကာကွယ်ဖို့ဖြစ်တယ်။ ဗျူဟာမြောက်တည်နေရာတွေကို သိမ်းပိုက်ပြီး ကျွန်တော်တို့ရဲ့ အမိမြေမှာ စကစရဲ့ ချုပ်ကိုင်မှု အားနည်းသွားစေဖို့ နှင့် တရားမျှတပြီး အားလုံးပါဝင်နိုင်တဲ့ ငြိမ်းချမ်းရေးအတွက် လမ်းခင်းသွားဖို့ ရည်ရွယ်တာဟုတ်တယ်။” ဟု KIA အတွင်းမှ သတင်းရင်းမြစ်တစ်ခုက ဖော်ပြခဲ့သည်။

“နှစ်ဖက်စလုံးဘက်က ထိခိုက်ကျဆုံးမှုက စစ်ပွဲရဲ့ အဖြစ်မှန်ကို ဖော်ပြနေတာပေါ့။ ပဋိပက္ခတွေ ဆက်လက်ဖြစ်ပွားနေတာကြောင့် လာမယ့်ရက်ပိုင်းတွေမှာ ဒဏ်ရာရတဲ့ စစ်သည်တွေအတွက် ဆေးဘက်ဆိုင်ရာ ထောက်ပံ့မှုတွေ ပိုလိုလာလိမ့်မယ်” ဟု ဖြစ်ပွားနေသည့် တိုက်ပွဲများကြားတွင် ဆေးဘက်ဆိုင်ရာ ထောက်ပံ့မှု အရေးတကြီး လိုအပ်နေမှုကို အင်တာဗျူးဖြေဆိုသူတစ်ဦးက မီးမောင်းထိုး ပြောကြားခဲ့သည်။

ကချင်ပြည်နယ်တွင် ၀၃၀၇ စစ်ဆင်ရေးသည် စစ်ရေး ထိုးစစ်ဆင်ခြင်း သက်သက်တော့မဟုတ်ပေ။ ၎င်းသည် မြန်မာ့ပြည်တွင်းရေးပဋိပက္ခများကို အဓိပ္ပါယ်ဖွင့်ဆိုထားသည့် သမိုင်းဝင်နာကြည်းချက်များ၊ လူမျိုးရေးခွဲခြားမှုနှင့် ပထဝီဝင်နိုင်ငံရေး အကျိုးစီးပွားများ၏ ရှုပ်ထွေးသော အပြန်အလှန်ဆက်စပ်မှုကို ထင်ဟပ်စေသည်။ ပဋိပက္ခများ ပိုမိုပြင်းထန်လာကာ အာဏာချိန်ခွင်လျှာ အပြောင်းအလဲများနှင့်အတူ ကျယ်ကျယ်ပြန့်ပြန့် ပါဝင်နိုင်သည့် ငြိမ်းချမ်းရေး လုပ်ငန်းစဉ်၏ လိုအပ်မှုမှာ ယခင်ကထက် ပိုမို တင်းကျပ်လာပါသည်။

၀၃၀၇ စစ်ဆင်ရေးသည် မြန်မာနိုင်ငံ နယ်စပ်ဒေသများတွင်ဖြစ်ပျက်နေသည့် ပဋိပက္ခများ၏ မူလဇစ်မြစ်ကို ဖြေရှင်းရန် အရေးကြီးကြောင်း ထင်ရှားစေသည်။ စဉ်ဆက်မပြတ် ငြိမ်းချမ်းရေးနှင့် တည်ငြိမ်ရေးသည် စစ်မှန်သော တွေ့ဆုံဆွေးနွေးမှု၊ အားလုံးပါဝင်သည့် ကိုယ်စားပြုမှု၊ တိုင်းရင်းသားလူမျိုးစုအားလုံး၏ အခွင့်အရေးနှင့် မျှော်မှန်းချက်များကို လေးစားလိုက်နာခြင်းဖြင့်သာ ရရှိနိုင်သည်။ တိုက်ပွဲလမ်းကြောင်းများ ပြန်လည်ရေးဆွဲလာသည်နှင့်အမျှ မြန်မာနိုင်ငံတွင် ထာဝရငြိမ်းချမ်းရေးဆီသို့ လမ်းကြောင်းမှန်ပေါ်ရောက်ရန် ပြည်တွင်းရော ပြည်ပပါ သက်ဆိုင်သူများအားလုံး ပူးပေါင်းပါဝင်ကာ ပိုမိုတောက်ပပြီး ပိုမိုပါဝင်နိုင်သော အနာဂတ်အတွက် လမ်းခင်းရန် လိုအပ်ပါသည်။