ပါဂျောင်မီဒီယာ။
၁၅ရက်၊ဇန္နဝါရီ၊၂၀၂၅။
ကချင်လွှတ်လပ်ရေးတပ်မတော်(KIA)နှင့် ပူးပေါင်းတပ်ဖွဲ့များ တိုက်ခိုက်သိမ်းယူထားသည့် ဇယ်ခန်းကျေးရွာတစ်လျှောက်တွင် စစ်ကောင်စီ၏ လေကြောင်းတိုက်ခိုက်မှုများ မကြာခဏရှိနေသောကြောင့် ဒေသခံများမှာ ဗုံးခိုကျင်းများပြုလုပ်ပြီး ပုန်းခိုနေရကြောင်းသိရသည်။
“တစ်ခါတစ်လေဆိုပေမဲ့ ကြောက်နေရတယ် လေယာဉ်တွေ့တာနဲ့ ကိုကြောက်ရတယ် ရွှာထဲဗုံးကျပေါက်တာနဲ့ ဘယ်သူဘယ်ဝါ ထိခိုက်သလဲ ဆိုပြီး စိုးရိမ်ရတယ်။ လေယာဉ်လာပြီဆိုရင် ဗုံးခိုကျင်းထဲ သွားပုန်းနေရပြီး၊ လေယာဉ်ပြန်မှ အိမ်ပြန်နေရတယ်“ဟု ဇယ်ခန်းဒေသခံတစ်ဦးက ပြောသည်။
လက်ရှိ ဝိုင်းမော်မြို့နယ်ရှိ ဇယ်ခန်းကျေးရွာသည် KIAထိန်းချုပ်မှုအောက်တွင် လှုပ်ရှားသွားလာ နေထိုင်ကြရသော်လည်း စစ်ကောင်စီ၏ လေကြောင်းတိုက်ခိုက်မှုကို စိုးရိမ်နေကြရပြီး၊ နေအိမ်ထိခိုက်ပျက်စီးမှုနှင့် ထိခိုက်ဒဏ်ရာ ရရှိသူများလည်း ရှိဖူးကြောင်း သိရသည်။
တစ်ဖက်တွင်လည်း စစ်ကောင်စီတပ်ဖွဲ့က ဝိုင်းမော်မြို့အပါအဝင် ကျေးရွာအချို့ကို လုံခြုံရေးတင်းကြပ်ထားပြီး၊ အချိန်ကန့်သတ်ချက်ဖြင့်သာ သွားလာခွင့်ပြုနေသည့်အပြင် စစ်ဆေးမေးမြန်းခြင်းများနှင့် စစ်ရေးလှုပ်ရှားမှုများ ယခုရက်ပိုင်းအတွင်း သိသိသာသာ လုပ်ဆောင်နေကြောင်း ဝိုင်းမော်ဒေသခံများထံမှ သိရသည်။
စစ်ကောင်စီတပ်က ဝိုင်းမော်မြို့အထွက် မုတ်လွှဲကျေးရွှာ လမ်းဆုံနေရာတွင် ဂိတ်အထိုင်ချထားပြီး လမ်းသွားလမ်းလာ ပြည်သူများ၊ ကားသမားများနှင့် ဆိုင်ကယ်မောင်းနှင်သူများကို အချိန်အကန့်အသတ်ဖြင့်သာ သွားလာခွင့်ပြုထားသည်။
အဆိုပါဂိတ်အားဖြတ်သန်းသွားလာနေသည့် ကားနှင့်ဆိုင်ကယ်များကို ပိုက်ဆံကောက်ခံခြင်းများ ရှိနေကြောင်းနှင့် ဂိတ်ကိုလည်း အမြဲဖွင့်ထားတာမျိုးမဟုတ်ဘဲ မနက်ပိုင်း ၆ နာရီမှ ၉ နာရီအထိ၊ ညနေပိုင်း ၃ နာရီမှ ၅ နာရီဝန်းကျင်သာ ဖွင့်လှစ်ပြီး ဖြတ်သန်းခွင့်ပြုနေကြောင်း ဒေသခံတစ်ဦးက ပြောသည်။
“ဂိတ်က တစ်နာရီ ဖွင့် တစ်နာရီ ပိတ်တယ် ဖွင့်လိုက် ပိတ်လိုက်နဲ့ ပိတ်ထားတဲ့ချိန်က များပါတယ် ဂိတ်ဖြတ်တဲ့သူ များမှ ဖွင့်ပေးတာ ကားသမားတွေဆီက ပိုက်ဆံတောင်းတာမျိုးလည်းရှိတယ်” ဟု ပြောသည်။
လတ်တလောတွင် စစ်ကောက်စီတပ်ကလေကြောင်းကို အသုံးပြုပြီး ဖားကန့်ဒေသ ၊ တနှိုင်းဒေသနှင့် အခြားဒေသများတွင် လေကြောင်းဖြင့်ဗုံးကျဲတိုက်ခိုက်မှုများ ခပ်စိပ်စိပ် လုပ်ဆောင်နေကြောင်း သိရသည်။
အဆိုပါ တိုက်ခိုက်မှုများကြောင့် ထိခိုက်ဒဏ်ရာရရှိသူများ၊ အသက်သေဆုံးသူများနှင့် အိုးအိမ်ပျက်စီးဆုံးရှုံးသူများ တစ်နေ့ထက်တစ်နေ့ ပိုမိုများပြားလာကြောင်း ဒေသသတင်းရင်းမြစ်များထံမှ သိရသည်။
သတင်း - ဖရိန်း
Comments