Pajau Media
24.3.2024
Waimaw Lamyang maga de KIA pawng hpawm hpung ni hte myen hpyen dap lapran ang katut gasat gala majan byin wa ai hte ya aten hpyen masa grai shaja hkat nga ai sha n-ga hpyen n-gun jat shamu shamawt ai lam ni grai galaw wa ai nga nna ginra masha ni tsun ai.
Gasat gala majan gaw March 22 ya kaw nna re hte ya aten du hkra hpyen masa shaja hkat nga ai rai nna Miwa jarit Kanpaiti shagyit hpe bai lu hkra Zahkung Ting Ying hte Myen hpyen dap pawng hpawm hpung ni gaw bai htim gasat wa ai re lam shawng lam shi sawk ni kawn chye lu ai.
“Dai Zahkung Ting Ying shan wa ni gaw Kanpaiti hpe bai lu hkra zing madu na nga nna Myen hpyen dap hte gindun nna Lamyang maga de wa gap ai re,” nga nna shawng lam shi sawk ni tsun ai.
Ya aten Myen hpyen dap pawng hpawm hpung ni gaw Waimaw ginra shara shagu hta hpyen n-gun jat shamu shamawt nga ai re hte n-gu malu msha ni jahting nga ai re. Kalang marang Drone bawm wa jahkrat ai lam, N bungli bawm, lak nak kaba ni gap bun ai re hpe mung chye lu ai.
N dai masa gaw gasat gala majan grai laja wa mai ai majaw Mung masha ni grai myit tsang nga ma ai lam Waimaw ginra masha langai tsun ai re. “N dai laman Waimaw kaw Myen hpyen dap hPyen n-gun jat shamu shamawt wa ai majaw gasat gala majan grai sawng wa na hpe mung myit tsang ai, kalang marang N bungli, Drone ni hte mung wa gap ai majaw grau hkrit ai,” nga nna amyu shayi langai tsun ai re.
Maga mi de Manmaw ginra kaw mung KIA pawng hpawm hpung ni hte Myen hpyen dap lapran gasat gala majan grai laja nga ai re hte Manmaw muklum tat sum ai lam n byin hkra Myen hpyen dap kawn laja lana ninghkap gasat nga ai re hpe mung chye lu ai.
Shiga- Hpring
Comments