Pajau Media
18.3.2025
Jinghpaw mung Hpakant ginra Wa Ra Zup mare kaw KIA hte ginra P.T.Ts hpung ni lapran hpyen masa grai shaja hkat nga ai sha n-ga Myen hpyen dap kawn n bungli hte mung htim gasat nga ai majaw ginra Mung masha ni shimlum ai shara de koi yen hkawm nga ra ai lam chye lu ai.
Wa Ra Zup ginra masha ni gaw March shata praw kaw nna hprawng yen hpang wa ai re hte ya aten mare kaw Masha n nga ai daram re mat sai lam ginra masha langai tsun ai re.
“ P.T.Ts hpung ni gaw Tank mawdaw 5 daram hte Wa Ra Zup de shang wa na Masha n nga ai nta hkan shanhte ra ai arung rai ni hpe la mat ai, wan nat jahten ya ai, nta masha nga ai ni hpe shaga la nna san jep ai lam ni galaw nna bai dat ya ai lam ni nga ai, ya gaw mare kaw masha n nga sai, yawng yen mat sai ” nga nna tsun ai re.
Lai wa sai Febuary shata praw daram kaw nna Wa Ra Zup ginra kata Min Ze Thant P.T.Ts hpung ni hpyen shamu shamawt ai lam ni shawoi na hta grau galaw wa ai majaw KIA pawng hpawm hpyen ni hte ang katut gasat poi byin ai lam ni nga ai re hpe mung chye lu ai.
Dai sha n-ga Febuary 17 ya shani hta mung Myen hpyen dap kawn n bungli bawm wa jahkrat bun ai majaw mung masha langai hkala nna asak si sum lai wa nna dum nta lahkawng wan kru hten hkrum sai re. March 14 ya hta mung gasat gala majan n nga ai Wa Ra Zup mare makau Nam Sai mare kaw mung Myen hpyen dap kawn n bungli bawm bai jahkrat bun ai lam nga ai re hpe mung chye lu ai.
Shiga-97
Commentaires