ပါဂျောင်မီဒီယာ။
၃၀ရက်၊ဒီဇင်ဘာ၊၂၀၂၄။
မြစ်ကြီးနား-မိုးညှင်းသွားလမ်းပိုင်းတွင် စစ်ကောင်စီတပ်နှင့် ပြည်သူ့စစ်များ၏စစ်ဆေးရေးဂိတ်တွေ ပိုမိုများပြားလာပြီး စစ်ဆေးရေးတင်းကြပ်နေခြင်းကြောင့် ခရီးသွားပြည်သူများ အသွားအလာ ခက်ခဲလာကြောင်းသိရသည်။
စစ်ဆေးရေးဂိတ်တိုင်းတွင် စစ်ဆေးမှုများပုံမှန်လုပ်ဆောင်နေသော်လည်း မြစ်ကြီးနားမြို့အထွက် မော်ဖောင်းစစ်တပ်ဂိတ်၌ ခရီးသွားအားလုံးကို ကားပေါ်မှဆင်းခိုင်းကာ မှတ်ပုံတင်သိမ်းယူပြီး ခရီးသည်များကို မှတ်ပုံတင်နံပတ် အလွတ်ပြောခိုင်းကာ
မပြောနိုင်ရင် ဟိုမေးဒီမေးနှင့်အချိန်ကြာမြင့်စွာ စစ်ဆေးခံနေရကြောင်း ကိုခရီးသွားပြည်သူတစ်ဦးမှ...
“ တစ်ခြားဂိတ်တွေ မှာလည်းစစ်တာတော့ စစ်ပါတယ် ပိုဆိုးတာက မော်ဖောင်း အထွက် စစ်တပ်ဂိတ်ကဆိုးတာ မနေ့ကမိုးညှင်းကအပြန်မှာ ကားပေါ်ပါလာတဲ့သူတွေ ရဲ့မှတ်ပုံတင်ကိုအရင်သိမ်းတယ်၊ ပြီးမှ တစ်ယောက်ပြီးတစ်ယောက် နာမည် မှတ်ပုံတင်နံပတ် အလွတ်ပြောခိုင်းတယ်၊ တစ်ချို့အသက်ကြီးတဲ့ သူတွေဆိုမပြောနိုင်ဘူးလေ အကြာကြီးမဖြတ်ခိုင်း ဘူး ဝတ်စုံအပြည့် သေနတ်တွေနဲ့ဆိုတော့ တစ်ချို့ မိန်းကလေးတွေ ဆို ရစ်လွန်းလို့ ကြောက် ပြီးငိုပြောယူရတာ စိတ်ပျက်စရာကြီး ”ဟုပြောသည်။
ယခုလိုစစ်ဆေးခြင်းများသည် ခရီးသွားပြည်သူများကို အသွားအလာနှောင့်နှေးစေသည့်အပြင် ခြိမ်းခြောက်သည့်သဘောသက်ရောက်နေကြောင်း ပြည်သူတွေများကပြောဆိုနေကြသည်။ မြစ်ကြီးနား-မိုးညှင်းသွားလမ်းပိုင်းရှိ (၂၁)မိုင် စုပေါင်းဂိတ်တွင်လည်း KIA, PDF များကိုထောက်ပံ့ပစ္စည်းတွေ ပို့ဆောင်သည့်သတင်းများ ရရှိထားသည့်အတွက် စစ်ဆေးရေးတင်းကြပ်လုပ်ဆောင်နေကြောင်းသိရသည်။
မြစ်ကြီးနား-မိုးညှင်းလမ်းပိုင်းတွင် စစ်ကောင်စီတပ်နှင့်ပြည်သူ့စစ်တပ်များ၏ စစ်ဆေးရေးဂိတ်ပေါင်း ၂၀ ခန့်ရှိပြီးဂိတ်တိုင်းတွင်ဂိတ်ကြေးကောက်ခံပြီး စစ်ဆေးရေးတင်းကြပ်မှုကြောင့် ခရီသွားပြည်သူများ ခက်ခဲနေကြောင်းကားသမား များကဆိုသည်။
Comments