ဗန်းမော်မြို့မှ စစ်ဘေးရှောင်များအတွက် နေရာထိုင်ခင်း၊ဆေးဝါး၊စားနှပ်ရိက္ခာနှင့်အဝတ်အထည်များလိုအပ်လျှက်ရှိ

ပါဂျောင်မီဒီယာ။

၂၄ရက်၊ဒီဇင်ဘာ၊၂၀၂၄။

KIAပူးပေါင်းတပ်ဖွဲ့၏ ကချင်ပြည်နယ်၊ ဗန်းမော်မြို့သိမ်းတိုက်ပွဲစတင်ပြီးနောက် ထွက်ပြေးတိမ်းရှောင်လာသည့် စစ်ရှောင်ပြည်သူများအတွက် နေအိမ်၊ ဆေးဝါးနှင့် အခြားအသုံးအဆောင်ပစ္စည်းများ လိုအပ်နေကြောင်းသိရသည်။

ဒီဇင်ဘာ(၄)ရက်မှ စတင်လာသည့် မြို့သိမ်းတိုက်ပွဲကြောင့် ဗန်းမော်မြို့မှ ထွက်ပြေးတိမ်းရှောင်လာကြသော စစ်ဘေးရှောင်ပြည်သူများသည် လက်ရှိတွင် KIO၏လွတ်မြောက်နယ်မြေ ဖြစ်လာသော မိုးမောက်မြို့နယ်အတွင်းရှိ စစ်ဘေးရှောင်စခန်းများတွင်နေကြသည့်အပြင် အချို့မှာကျေးရွာအတွင်းရှိ အိမ်ထောင်စု လူဦးရေနည်းသည့်အိမ်များတွင် နေထိုင်နေရကြောင်းလည်းသိရသည်။

တိုက်ပွဲကြောင့် ကိုယ်လွှတ်ရုန်းထွက်ပြေးလာရသည့်အတွက် အိမ်သုံးပစ္စည်းနှင့်စောင်များလည်းလုံလောက်စွာမပါသဖြင့် ခက်ခဲနေခြင်းဖြစ်ပြီး ဆောင်းရာသီဖြစ်သည့်အတွက် စခန်းအတွင်း ဖျားနာသူများလည်းရှိနေပြီး ဆေးဝါး၊ အနွေးထည်များ၊ စောင်များနှင့်အခြားအိမ်အသုံးအဆောင်ပစ္စည်းများ လိုအပ်နေသည့်အပြင် သောက်သုံးရေများလည်းလိုအပ်နေကြောင်း ဒေါ့ဖုန်းယန်မှစစ်ရှောင်ပြည်သူများကပြောသည်။

လက်ရှိ ‌ဒေါ့ဖုန်းယန်တွင် ဗန်းမော်တိုက်ပွဲ ကြောင့် ထွက်ပြေးတိမ်းရှောင်လာသူ ၂,၈၀၀ ကျော်ရှိသည့်အပြင် မိုးမောက်မြို့နယ်မှ KIO အစိုးရ၏ လွှတ်မြောက်နယ်မြေဖြစ်လာသည့် ဒေသများအတွင်း တိမ်းရှောင်လာသော စစ်ဘေးရှောင်ပြည်သူဦးရေ ၁၁၀၀၀ ကျော်လာပြီဖြစ်ကြောင်း ၂၀၂၄ ၊ ဒီဇင်ဘာ ၁၉ ရက်အထိပြုစုထားသော စာရင်းများအရသိရသည်။