Hpakant Ginra Lung Seng Htu Sha Ai Lam Hpe Lit Nga Ai Ni Kawn Atsawm Gawn Hkang Na Matu Mung Masha Ni Ra Sharawng Nga

Pajau Media

21.3.2025

Hpakant Seng Tawng Nam Maw mare kaw March 21 ya jahpawt daw hkying 8:00 Am aten daram hta hkum pup nawng gyi ru wa ai majaw mare lam hkan hkum pup hkrai rai mat ai lam chye lu ai.

Gyi ru wa ai hkum pup nawng gaw Nam Maw mare baw maga de na rai nna lam maw hku dingyang gyi ru yawng wa ai hte masha n mai lai hkra byin ai lam facebook ntsa hkan mara da ai sumla hkrung ni kaw na mu chye lu ai re. Dai hpe Hpakant ginra shinggyim nau na karum hpung ni kawn lawan ladan sa du jasan jaseng ai lam ni galaw ai lam mung chye lu ai.

Hpakant ginra hta ya na zawn grai tsang ra ai hkum pup nawng ni grai naw nga ai hte dai hkum pup la-Ing ni hpe lit nga asuya hte company ni pawng hpawm nna Mung shawa ni hkra machyi ai lam n nga hkra galaw ya na hpe Mung masha ni ra sharawng nga ma ai raitim kadai mung lit la galaw ai lam n nga ai re hpe mung chye lu ai.

Hpakant ginra gaw lung seng maw ginra re hte maren Company law law shang nna galaw sha ai raitim lung seng htu ai Mye Za ga shingput ni hpe kam ai hku ru sumpum ai majaw Mye Za ga shingput gyi ru nna mung shawa asak si sum ai lam nga ai sha n-ga hkum pup nawng gyi ru ai majaw Mung masha hta hkra hkala ai lam, hten za ai lam law nga ai re.

Ya aten Mung shawa myit makam lu ai Wunpawng mungdan shang lawt asuya kawn mung Hpakant ginra na lung seng htu sha ai lam hpe atsawm tara hte hkrak rai gawn hkang na hpe ginra masha ni ra sharawng ai lam mung tsun ai.

“Company hte seng ai shara ni hkrai re, Mye Za gyi dat, hkum pup nawng gyi dat re na, gara asuya mung dai hpe atsawm lu gawn hkang ai lam n nga ai. Hkum pup nawng kaba ba re ai grai naw nga ai, dai na matu grai myit hki lit nga ga ai,” nga nna Hpakant ginra masha langai tsun ai re.

Hpakant ginra lung seng htu sha ai hta 2021 Myen mungdan uphkang masa galai mat wa ai hpang kaw nna kam ai hku htu sha wa ai re hte 2025 January shata 13 ya yup tung aten hta mung Sabaw maw kaw hkum pup nawng ya na zawn gyi ru wa ai majaw dum nta 50 jan hten za nna Mung shawa 30 jan kaput lawm mat ai mabyin byin lai wa sai re hpe mung chye lu ai.

Shiga- Hpakant