Pajau Media
19 March 2025
Putao Hkawng Lang Hpu muklum hkyen bum ginra rai nga ai Shin Hkawng mare hta mani March 18 ya jahpawt aten hkan dum nta wan hkru ai mabyin bai byin hkrum ai lam ginra masha ni tsun ai kawn chye lu ai.
“Mani hpawt hkru ai, dum nta 10 ram lawm mat ai, gara hku na hkru hpang wa ai hpe gaw nchye lu shi ai. Maram lu ai hku nga yang gaw Sha Gaw bang mahkawng da ai shara nga, ai shin na masha gaw nnga ai. Dai shara hkan shinggan kaw na sa wa ai masha ni wan sa wut da ai zawn re ai kaw na wan hkru hpang ai rai sam ai. Maning mung dingre kaw na wan hkru wa ai re, hkrat sum ai lam grai law ai,’’ nga nna ginra kata na rai htaw mawdaw sara langai tsun ai.
March 18 ya shani hta wan hkru wa ai rai nna mare masha ni na dum nta 10 sha n-ga nta kata na arai law law hten sum mat wa ai hpe chye lu ai.
Shin Hkawng ginra hta lai wa sai 2023 ning November shata hta mung kalang mare ting ngu na daram wan hkru lawm mat lai wa sai rai nna 2025 ning March 18 ya shani hta mung kalang bai wan hkru manghkang bai kahtap byin ai hpe chye lu ai.
Lai wa sai shaning hta byin lai wa sai wan hkru ai mabyin hta dum nta 63 ram hkru lawm mat ai rai nna Shin Hkawng ginra na dum nta chyen mi ram wan kaw lawm mat ai re hte dai ning hta mung kalang bai kahtap byin ai re lam tsun ai.
Shin Hkawng mare gaw myen mung kata hta langai sha nga ai hkyen bum mare rai nna htinggaw 2,000 jan shanu nga ai Miwa mung na jarit mare langai re.
Shiga – Mali Hku
Comments