Pajau Media
19/3/2025
Putao ginra kata March praw kaw nna Marang matut manoi htu sawng wa ai majaw Hkawng Lang Hpu hkawm sa hkrum lam ninggam gyi ru, lam pat nna hkawm sa hkrun lam yak hkak nga ai lam ginra masha ni tsun ai.
Putao kaw nna Hkawng Lang Hpu Ri Dam mare du hkra Mawdaw ni mai hkawm sa ai raitim n dai shata laman Marang ladu lai htu sawng ai majaw hkrun lam hten mat nna cycle pyi nmai lai ai madang byin nga ai lam ginra masha langai tsun dan ai re.
“Hkawng Lang Hpu lam pat mat ai bat mi jan wa sai, Mawdaw cycle n mai lai sai. Hkawng Lang Hpu de lung na masha ni mung Putao kaw sha naw chyat taw nga ma ai. Mawdaw ni mung n mai pru re taw nga ma ai. Bat mi daram Jan bai ja yang she lam hkraw na re, Ga gyi ru da ai hkan Ga naw shara ra ai. Ya gaw San Lut Chat bum lapran du hkra sha mawdaw lam hkrang ai,” nga nna Mawdaw sara langai tsun ai.
Ya aten Hkawng Lang Hpu, Shing Hkawng ginra hta Shau Gaw hte tsi ru tsi pawt ni hpe Putao de dut mari hpaga galaw nga ma ai re hte ya na zawn hkrun lam hten za ai majaw gunrai dut mari lam ni mung hkring nga ai re hpe mung chye lu ai.
Hkrun lam naw hkrang nga ai aten gaw Shing Hkawng ginra hkyen bum lung masha ni lai wa lai sa grai law ai re, raitim n dai laman hkrun lam hten ai majaw hkrun lam hkawm masha n nga ai daram re sai lam ginra masha ni tsun ai kawn chye lu ai.
Shiga- Mali Hku
Comments