Pajau Media
21.3.2025
Ya aten Jinghpaw mung ginra kata hpyen masa gaw shaja hkat nga dingyang rai nna Myen hpyen dap gaw jawng dat aten Mung masha yawng hte seng ai Hpaji Jawng ni hkan shimlam la shara jahkrat ai lam ni galaw wa ai re.
Hpaji jawng dat ai hte Myen hpyen hpung ni kawn Mawdaw hte du shang wa nna Hpaji jawng kaw shara jahkrat nga ai hpe ginra masha langai tsun ai hta, “Myitkyina Chyara Pati Lawu Tsang jawng kaw re, March praw hkan na re sai, dai kaw shimlam la shara jahkrat nna nga wa ai re. Mare masha n kau tsun ai gaw shana ten hpyen mung lahkawn ai da. Lam makau kaw nan re majaw shana aten lai wa lai sa galaw na mung myit tsang ai, shimlum lam n nga ai zawn nga ai” nga nna Chyara Pati ginra masha langai tsun dan ai re.
Ya aten Jinghpaw mung Manmaw ginra de mung gasat gala majan matut manoi shaja nga ai re hte Myitkyina ginra nga Mung masha ni mung hpyen masa maja let sha nga nga ai hta ya na zawn Mung masha hte ni kahtep dik ai shara hkan Myen hpyen dap kawn shara la wa ai majaw Mung masha ni grau myit tsang ai lam tsun nga ma ai re.
Dai sha n-ga Balamin Htin mahkrai kaba kaw mung lai wa lai sa Mawdaw hte cycle ni hpe matut manoi jep joi nga ai sha n-ga Maina Lahta Tsang Jawng sa lam hkan, jawng wang grup grup hkan mung Myen hpyen dap kawn shimlam la sin nga ma ai re hpe mung chye lu ai.
Ginra masha n kau gaw tsang 12 san poi htai ai majaw shimlam la ai re lam tsun ai hte ginra masha nkau gaw San Poi ngut ai hte jawng kaw shara la dap jahkrat na masing ni mai byin ai nga nna tsun maram nga ma ai re.
Shiga-Pyilan U
Comments