Pajau Media
30.8.2024
Wunpawng mungdan shanglawt hpyen dap KIA pawng hpawm hpyen hpung ni hte Myen hpyen dap lapran March shata daram kawn Sumpra Bum ginra gasat gala majan byin hpang ai rai nna shata masum daram na ai hpang padang dip zing madu da lu sai re hte ya aten ginra gaw sharawt masing kata yak hkak ai lam ni grai nga nga ai lam ginra masha ni tsun ai.
Ya aten ginra kata gawgap masing ni galaw hpang nga sai raitim lam shagu grai naw yak hkak nga ai hte masha n-gun grai kadawn nga ai lam ginra masha tsun ai.
“Ya aten Sumpra Bum ginra kata Myen hpyen dap tsep kawp tsai sai re. Myen hpyen dap Uphkang masa ni yawng hten za sai. Ya gaw NUG, KIO asuya hparan hpareng ai kata uphkang hpang nga sai hte jawng ni mung hpaw nga sai raitim sharin sara n law ai. Hkam ja lam hte seng na mung matut mahkai lam grau yak hkak mat ai majaw tsi mawan n law ai mayak ni nga ai. Hpaji chye ai ramma n-gun grai ra nga ai,” nga nna Sumpra Bum ginra hpung magam gun sara langai tsun ai.
Sumpra Bum ginra hpe lai wa sai march shata kaw nna gasat gala majan hpang wa ai re hte ginra masha yawng mung nam de hpyen koi yen hkawm ra mat ai re. Gasat gala majan shata masum daram na ai hpang May 5 ya daram hta ginra hpe tsep kawp padang dip zing madu la lu ai re. June 12 ya daram hta gaw nam de koi yen ai mung masha ni yawng mung bai n htang wa ai hpang ginra gawgap masing ni hpang wa ai re hpe mung chye lu ai.
Sumpra Bum ginra gaw ya aten simsa ai shara ngu mai tsun ai raitim Putao ginra hte ni gahtep ai N Sai Yang, Hkindu Ga, N-gaw Ma hte Hpung Chyan mare masha ni gaw hpyen koi yen ra na hpe mung grai myit tsang nga ma ai re. Dai mare ni gaw Sumpyi Yang kaw dap jung ai Myen hpyen dap ni shamu shamawt nga ai ginra mayan na mare kahtawng ni re majaw aten ntam gasat gala majan byin wa na hpe mung tsang nga ma ai lam chye lu ai.
Comments