Pajau Media Channel
7th May, 2024
Sumpra Bum Myen hpyen dap Hk.L.Y (46) Dap hpe May (5) ya shani padang dip zing madu la lu sai re hte ya aten ginra jasan magam bungli ni matut manoi shang nga ai sha n-ga n bungli hpyen naw maja ra ai masa re majaw hpyen koi yen mung masha ni buga de n lu wa shi ai lam chye lu ai.
Hpyen koi yen mung masha ni gaw ginra shimlam nga ai aten hte wunpawng mungdan shanglawt asuya kawn wa ahkang jaw ai aten hkan she buga de wa na matu myit daw dan da ai lam hpyen koi yen mung masha tsun ai.
“anhte gaw masa kaji mi naw la dingda yu rai nna , lam ni hpaw wa sai nga jang anhte a matu shim lam kaji mi nga sai kaw na gaw bai wa na matu myit nga ga ai, ya na masa gaw n bungli ni mung tsang ra, bungli shang ai ni, magam dap ni shanhte tsun ai hta sha hkan sai, bai wa mai sai nga yang jang she bai wa na hku myit daw dan da ga ai”
Marang ladaw mung du wa sai re majaw sai hte palasatik ginsup hte sha nga ai re majaw shim lam gaw n nga ai, maji mayan law ai re majaw ya aten ma ni machyi makaw law wa ai lam mung ya na zawn tsun ai.
“ya nam shalawng kata de ginsum kasha ni gap na nga ga ai, marang ni htu wa yang gaw yak ai lam chyawm law law re, Mu ga ni mung nau nlaw ai re majaw dap kaji ji sha re ai hkan re matsut rawng dai hku re, laga hkam ja lam gaw ji grawng mayan ni law wa ai re majaw ya gaw ma ni tuk kwi machyi ai lam ni nga wa ai, ndai hta na jang gaw hkam ja lam gaw grai tsang ra ai de du wa na masa nga ai”
Ya aten hpyen koi yen mung masha ni gaw mai wa sai nga ai aten she wa lu na re hte galoi aten du hkra Nam hkan nga ra na ngu n lu tsun ai, ya aten malu masha hte tsi mawan ni ra kadawn nga ai lam mung chye lu ai. Sumpra Bum ginra de lai wa sai April 16 ya daram kaw nna htu shadut htim gasat majan sawng wa ai re hte Sumpra Bum ginra kata na Mung masha 1,300 hkawt nam de hprawng koi yen hkawm mat ai re, dai ning gaw yi galaw sha aten nlu galaw sha mat sai re majaw du wa na shaning ni hta gaw Sumpra Bum ginra masha ni malu masha yak hkak wa na masa nga ai lam hpyen koi yen mung masha ni tsun ai kaw chye lu ai.
Shiga - Hugawng
Comments