Pajau Media
21.10.2024
Jinghpaw Mung Myitkyina kaw October 14 ya kaw nna Passport Laika buk mai galaw sai lam n dau wa ai hpang Passport galaw na matu Mandalay, Yangon du nga ai Jinghpaw Mung masha ni gaw Passport n lu galaw la ai sha n htang wa ra mat ai hte Guhpraw law law sum machyi ai lam byin hkrum ai nga nna Mung masha ni tsun ai.
Jinghpaw Mung kata Online dawm kau ai July 21 hpang kaw nna Online magam bungli hte Passport galaw ya ai rung ni mung yawng hkring ra mat ai majaw Jinghpaw Mung na Mung masha ni yawng Yangon Mandalay de passport wa galaw la ra ai re.
Online appointment date la nna Yangon Mandalay de Passport galaw na matu gumhpraw law law ma hkam nna sa ai raitim Jinghpaw Mung kata October 14 kaw nna Passport mai galaw sai lam n dau wa ai hpang Yangon Mandalay kaw Passport galaw na matu du nga ai ni gaw Passport mung nlu la mat nna gumhpraw sum machyi mat ai lam ni byin ai nga nna ginra masha langai tsun ai.
“Jinghpaw Mung kaw Internet n lu ai majaw Passport galaw na matu Mandalay de sa ra ai. Mawdaw lam mung rim ai hte jep ai lam ni grai galaw ai majaw n gwi sa ai. Nbungli manu gaw Mandalay-Myitkyina wa wa sa sa Sen 9 ram ma ai. Mohnyin kaw na Myitkyina Mawdaw shabrai sen mi, smart card n mai galaw ai majaw Madalay kaw wa galaw sen Lahkawng jan ma ai. Mandalay kaw bai smart crad galaw na matu 6 ya daram na ai, sha shabrai, nga shabrai grai ma ai. October 14 kawn Mandalay hte Yangon kaw n galaw ya sai nga majaw Passport n lu ai bai n htang wa ra mat ai,” nga nna tsun dan ai re.
Passport galaw na matu Jinghpaw Mung kaw nna Yangon Mandalay de yak yak hkak hkak rai sa galaw ai raitim Passport n lu ai sha bai n htang wa ra ai lam Hpakant ginra masha langai mung matut tsun dan ai re.
“Hpakant kaw na Mandalay de wa galaw ai wa htingaw jahpan dingsa taw ai hpe mung madung (မူရင်း) nre nga na Madalay kaw na Yangon de bai sa galaw ra ai, Yangon kaw mung tinang na aten du na matu grai la ra ai, bat mi daram na mat ai, lu na sha na kaw na hkawt tsam mari tinang na aten du ai hte Passport n dai kaw n galaw ya sai nga na Passport n lu ai sha bai n htang wa ra ai, n htoi shi ya daram na ai Sen 25 daram ma mat ai,” nga nna tsun dan ai re.
Jinghpaw Mung kata Internet line dawm kau ai majaw Mung masha ni lam magup grai yak hkak mat ai re hte dai ni hte rai yang shata 3 hpring sai raitim bai hpaw ya ai lam n nga shi ai re. Ya aten Myitkyina-Mandalay lam lapran hta gasat gala majan ni a majaw hkrun lam pat da ai re hte hkrun lam hkawm Mung masha ni gaw Koi lam hku hkawm sa nga ai hta masum na daram lam kaw yup ra ai sha n-ga laja lana jep joi nga ai re hpe mung chye lu ai.
Shiga - Kachyin Pyi tar
Comments