Pajau Media Channel
June 20, 2024
Waingmaw, Wuyan pyitutsit shagyit hpe June shata 19 ya shana daw aten daram kawn pat kau ai majaw ngam nga ai ginra masha nkau mi chyat rawng nga ai nga nna ginra masha langai tsun shana ai kawn chye lu ai.
Waingmaw ginra hta majan sawng wa ai hpang Wuyan mare hte Mading, Hkakum, Mukchyik, Lamyang, Nam-Wa hte Labang mare kata na mung shawa ni gaw, lai wa sai May shata 21 ya shani kawn hpyen koi yen hprawng mat wa sai re.
Hpyen koi yen hprawng mat ai ginra masha ni hta hkauna na-bra gat na matu ngam nga ai ni, gaw ningja ni hte asak kaba sai gumgai dingla nkau mi gaw Wuyan mare hte ni dik ai Lamyang mare hta majan byin wa ai majaw hpyen koi yen hprawng pru wa yang Wuyan pyitutsit shagyit hta nlai lu ai ngu hkum pat hkrum ai re, nga nna, Mukchyik mare hta chyat rawng nga ai ginra masha langai Pajau Media de ndai hku tsun dan ai.
“Ndai kaw hkauna na-bra gat na matu la taw ai ni, lam nlu hkawm ai asak kaba sai ni hte gaw ningja nkau mi naw ngam nga ai re. Nye moi ni chyawm mani kawn Gwi Htu lam hku yawng mat sai. Ya gaw Gwi Htu lam hku sa yang mung hkying 4,5 na ai. Maw daw shap na mung nnga sai. Cycle hte gaw masum mali lang gin htang sa ra ai. Lam masa lam mung atsawm nchye ai majaw yak hkak nga ga ai.”
Ya ngam nga ai ginra masha ni gaw shani aten tinang dum n-ta hta shingbyi nhtawm, shana aten rai jang mare hte ni htep ai shara hkan yup let, hkauna na-bra gat na matu la nga ai ni re hte, Lamyang mare makau na majan sawng wa ai aten hta Waingmaw muklum kata de hprawng koi yen sa wa ai aten Wuyan pyitutsit shagyit hta nlai shangun ai majaw bai nhtang wa ra mat ai re lam tsun dan ai re.
Lai wa sai June shata nhtoi 17 ya shani kaw nna Lamyang mare de Myen hpyen dap ni hpyen n-gun htu shadut lung wa ai hpe KIA hpawng hpawm hpyen hpung ni hkap shingla gasat dat ai kawn Lamyang mare makau hta lahkawng ya tup majan laja lana byin lai wa sai re. Dai majan hta Myen hpyen dap maga na ahkang aya lu ai Du langai hte hpawn, hpyen ma 10 jan hkrat sum mat ai re hpe mung matut chye lu ai.
Comments