Pajau Media Channel
July 18, 2024
Waingmaw, Wuyan P.T.Ts hpung ni kawn July 18 ya jahpawt daw hta Wuyan buga hpung up sara Mading Hkaw Bawm hpe P.T.Ts hpung ni kawn san ra ai lam nga ai nga nna dum nta kaw na shaga woi mat ai lam ginra masha langai tsun ai.
Sara hpe woi mat ai lam hte seng nna mabyin hpe tup hkrak gaw n lu tsun ai, na lu ai shiga masa ni gaw July 17 ya shani Wuyan myen hpyen dap, P.T.Ts pawng hpawm hpyen hpung ni mung masha ni hkawm sa nga ai hkrun lam hpe Backhoe hte htu taw nga ai vedio clip gayet mara ai ngu ntsen n hten ai majaw woi mat ai re lam shiga mawng nga ai raitim lawng lam tup hkrak n chye lu ai lam ginra masha langai tsun ai.
“Nta kaw P.T.Ts hpyen la marai 4 sa wa nna jahkring mi nga shaga la mat ai, nta htingbu na ni mu dat ai. Ya du hkra chyawm shanhte na dap kaw sha woi da ai. Dai kaw mare salang wa hpe phone set yu yang dai na de hkan dat ya na nga tsun ai lam gaw nga ai.”
P.T.Ts pawng hpawm hpyen hpung ni hpung magam gun sara hpe hpa majaw woi mat ai lawng lam tup hkrak gaw n lu tsun ai, dingyang ngu na daram lai wa lai sa mung masha ni hpe hkap jahkring jep joi gumhpraw hta ai lam ni galaw nga ai re hpe mugn chye lu ai.
Ginra masha ni tsun ai hta Waingmaw ginra de myen hpyen dap pawng hpawm hpyen hpung ni gaw kaduk htu ai lam ni galaw nna shimlam grai shagreng wa ai re lam chye lu ai. Wuyan P.T.Ts dap gaw Waingmaw 58 Dap hpe makawp da ai ahkyak ai shara langai mung re hte n dai laman hpyen n-gun jat shamu shamawt hkawm ai majaw hpyen masa gaw laja wa na masa nga ai lam ginra masha ni tsun ai kaw na chye lu ai.
Comments