Warazup Mare Kaw Min Zay Thant P.T.Ts Dap Shara Jahkrat Dung Nna Shamu Shamawt Nga

Pajau Media

7 April, 2025

Danai Lido lam Warazup mare kaw Hugawng ginra hta shamu shamawt nga ai Min Zay Thant P.T.Ts ni April 4 ya shana daw kaw nna shara jahkrat nga hpang nga nna mare kata shamu shamawt nga ai re hte Mung masha dum nta wan nat ai lam ni galaw nga ai re lam ginra masha ni tsun ai.

“Warazup kaw gaw kadai n nga sai. April 3 ya kaw nna Min Zay Thant P.T.Ts ni wa gap ai hpang praw 4 ya shana daw hta gaw mare kata kaw nan P.T.Ts ni dung taw sai. Warazup mare kaw nta 6 daram hpe mung wan nat ai nga, mare de n mai wa yu ai majaw n lu sa yu sai. Ya gaw hkawm sa hkawm wa mung Warazup mare hku gaw n lai shangun mat sai,” nga nna Warazup ginra masha langai Pajau Media de tsun wa ai re.

Warazup mare kaw shawng daw de gara maga na mung wa dung ai lam n nga ai. March 2 ya daram kaw nna KIA maga kawn mare pru shang shara kaw shagyit galaw nna wa dung ai hpang P.T.Ts ni wa gap ai majaw hpyen masa grai shaja hkat wa ai re. Warazup mare de P.T.Ts ni numdaw lahkawng lang ngu na wa gap ai hpang P.T.Ts ni Warazup kaw shara la dung mat ai re lam chye lu ai.

Myitkyina Lido lam mayan Lawa mare kata March 31 kaw nna Myen hpyen dap shara la wa dung ai hpe KIA pawng hpawm hpyen hpung ni April praw laman gawt shapraw kau lu sai re. Ya aten Myen hpyen dap ni gaw Jinghpaw mung Manmaw ginra sha n-ga Indaw ginra hkan mung shani shagu nbungli bawm laja lana gap bun nga ai lam chye lu ai.

Ya aten Sagaing jarit Kahta ginra de mung hpyen n-gun jat shamu shamawt nga dingyang re sha n-ga shani shagu lak nak kaba gap bun nga ai majaw Kahta muklum kata de mung majan laja wa na hpe Mung masha ni myit tsang ai lam ginra masha ni tsun ai kaw na chye lu ai.

Shiga – Pyilan U