Pajau Media
15th March, 2025.
KIA Masat (2) Dap Ba, Masat (14) Dap Dung ginra hta Wara Zup Pyi Tu Tsit hpyen hpung ni hpe Wunpawng Mungdan Shanglawt Hpyen dap (KIA) hpyen hpung ni kaw nna gap gasat majan byin ai lam chye lu ai.
March shata nhtoi 14 ya jahpawt hkying 7 am aten hta Gumshem myen hpyen dap npu, Wara Zup P.T.Ts n gun (50) daram hpe Wa Hka post maga de hpyen shamu shamawt lung wa ai ten, KIA hpyen hpung ni kawn bawm hte hkap gasat ai re lam chye lu ai.
Wara Zup ginra hta P.T.Ts hpyen hpung ni hte KIA hpyen hpung ni masa shaja hkat, majan laja nga ai rai nna, Gumshem myen hpyen dap kaw nna mung majan byin ai lam nnga ai Wara Zup mare makau Nam Sai mare de Jet Fighter nbungli lahkawng hte bawm sa jahkrat gap gasat ai re hpe chye lu ai.
Ndai laman hta sha myen hpyen dap ni gaw majan nbyin ai shara ni de nbungli, Drone ni hte ding yang hkrup mara gap gasat nga ai re.
Ya aten hta gaw, Manmaw ginra hta mung Ts.K.Hk (21) dap hpe KIA pawng hpawm hpyen hpung ni htu shadut majan byin nga ai sha n ga, myen hpyen dap maga kawn mung shani shagu, nbungli hte gap gasat ai lam, laknak kaba hte hkrup mara gap shadam ai lam ni hpe galaw nga ai re hpe matut chye lu ai.
Shiga – Htu Seng
Комментарии