Pajau Media Channel
July 17, 2024
Waingmaw ginra Myen hpyen dap, P.T.Ts pawng hpawm hpyen hpung ni gaw Wuyan mare makau mung masha ni hkawm sa hkawm wa galaw nga ai lam hpe July 17 ya shani htu di nga ai lam ginra masha ni tsun ai kaw na chye lu ai.
“Dai hpawt re. P.T.Ts hpyen dap makau na Jinghpaw lawk numshe re, Wuyan mare manap gat mung ka-ang hkup kum la kau masai. Shahte gaw Wuyan gate pat kau ai majaw dai maga hku na mawdaw cycle ni lai hkawm ai majaw re sam ai. Hkawm sa hkawm wa galaw taw ai ni hpe dingsa ai ga rai nga,” nga nna ginra masha langai tsun ai re.
Lai wa sai June 17 ya shani hta mung Lamyang mare kata hpyen n-gun htu shadut lung wa ai Myen hpyen dap hte KIA pawng hpawm hpyen hpung lapran Lamyang mare makau kaw lahkawng ya na hkra gasat gala majan byin ai hpang Wunyan P.T.Ts dap jung ai shara hpe June 19 ya shani pat kau ai re.
Ginra masha ni gaw Wuyan manap gat hku nna lai hkawm nga ai re hte Myen hpyen dap maga na mung hpyen n-gun jat shamu shamawt nga ai sha n-ga Wuyan manap gat hpe mung Myen hpyen dap maga kawn wang kum nna shimlam la nga ai re lam tsun ai re.
“Shanhte ni wang kum shara la da ai shara gaw manap gat wang shara re. Lam langai hpe sha ngam da ai re. Ya Manap gat mayan bai htu di ai ga rai nga.”
N dai masa hte seng nna mung masha ni tsun ai hta Myen hpyen dap gaw mung masha ni hpe hpyen hku masat nga ai rai nna shahte shimlam a matu myit tsang wa ai majaw ya na zawn shimlam shagreng wa ai re hte n dai laman hpyen n-gun jat ai lam ni galaw wa ai re hpe mung chye lu ai. Lai wa sai June 17 ya shani hta mung Myitkyina muklum Ake mare hte Hparaw mare hpe matut da ai lam hpe backhoe hte htu di kau ai majaw lai wa lai sa grai yak hkak mat ai re lam chye lu ai.
コメント