Waingmaw Muklum Hta Myen Hpyen Dap Kawn Jepjoi Shara Jat Da Ai Lam Ginra Masha Ni Tsun

Pajau Media Channel

21st August, 2024

Gasat gala majan a majaw koi yen mat ai mung masha law law nga ai Waingmaw ginra lam kaba shara n kau hkan myen hpyen dap ni kawn jepjoi shagyit ni jahkrat da ai hta jepjoi shara n nan (5) daram bai jat da ai lam ginra masha ni tsun ai.

Waingmaw ginra kata mung masha ni gaw March 7 ya kawn Wunpwang Mungdan Shanglawt Hpyen Dap KIA pawng hpawm hpung ni kawn htu shadut majan htim gasat hpang wa ai hta shawng ningnan lang hpyen koi yen ra mat ai sha n-ga May 21 ya hta mung numdaw lahkawng lang ngu na koi yen hkawm ra mat ai re hpe mung chye lu ai.

Dai hpang Waingmaw-Myitkyina hkawm sa lam Nmyen Hka mahkrai shang wa ai hte pru wa ai shara ni kaw mung Myen hpyen dap jepjoi shara lahkawng galaw nna dung nga ai hte Waingmaw shang wa ai shara kaw mung mare ninghtawn magam dap hte Myen hpyen dap pawng nna shara jahkrat da let lai wa lai sa, gunrai htaw mawdaw ni hpe gumhpraw hta sha nga ai re lam chye lu ai.

Waimaw-Sadung lam ntsa Wuyan P.T.Ts Dap makau kaw mung pawng hpawm dap shara langai jahkrat nna gumhpraw hta sha nga ai rai nna lai wa lai sa mung masha ni hpe laja lana san jep ai lam ni galaw nga ai re hpe mung chye lu ai.

March 7 ya kawn byin ai gasat gala majan hpang KIA pawng hpawm hpung ni kawn Waingmaw ginra nga Hk.M.Y 321 hte Waingmaw-Laiza lam ntsa kaw nga ai Myen hpyen dap shara ni yawng ngu na daram htingnut mat ai raitim Myitkyina-Waingmaw lam shara n kau hta Myen hpyen dap ni kawn shara bai la nna gumhpraw hta sha nga ai re hpe mung chye lu ai.

Lai wa sai March 7 ya kaw nna byin hpang ai gasat gala majan hpang Waingmaw-Laiza lam ntsa na mare kahtawng ni, Chihpwi-Sadung lam ntsa hte Mali Hka mayan hkan na mare kahtawng 24 kaw shanu nga ai mung masha yawng ngu na daram hpyen koi yen hkawm ra mat ai re hpe mung chye lu ai.

Mung masha ni hpyen koi yen mat ai hpang Waingmaw-Kanpaiti lam hku nna hkawm sa hkawm wa mung masha n nga mat ai madang rai nga ai hte Miwa jarit Kanpaiti hku na htaw shalai ai jak sau htaw mawdaw kaba n kau sha lai hkawm mat ai madang re hpe mung chye lu ai.