Pajau Media Channel
June 24, 2024
Waingmaw hpyen yen mung shawa law malawng gaw, mali hka hte marang hka jai lang ra nga ai sha n-ga, lu hka san nlu ai majaw kan ana hte hka li machyi masha law wa ai lam chye lu ai.
Kan ana machyi ai masha law malawng gaw ma kaji hte asak kaba sai gumgai dingla ni rai nna, N-gan mare hta hpyen yen nga ai Nawng Hkyi mare masha hkying mi grup yin hta na, masum tsa daram gaw kan mase ana hkrum sha nga ai re.
Seng ang ai wuhpung wuhpawng kaw nna lu hka san garum ai lam loi li nga ai raitim, jai lang ai hka hte shadu lu shadu sha ai hta lang ai hka gaw mali hka hpe madung jai lang ai rai nhtawm, lanam ladaw re majaw ma kaji ni, asak kaba gumgai dingla ni, machyi makaw law wa ai re. Dai ni hta na nkau mi gaw kan mase ana machyi ai sha n-ga, hka li machyi ai masha mung nga wa ai re hpe chye lu ai.
N-gan mare hta shanu nga ai Nawng Hkyi hpyen yen mung shawa ni gaw lai wa sai ten mali hka hpe sha jai lang ai zawn, lanam ladaw aten hta mung marang hka hpe sha jai lang nga ai lam tsun ai.
Dai hte maren, hka makau hkan hpyen yen nga ai Shwe Nyaung Pyin, Aung Myay 1, Aung Myay 2 hte Da Law Gyi mare hkan na hpyen yen mung shawa ni mung mali hka hpe sha madung jai lang taw ai re majaw, kan mase ana hkrum sha nga nna, Washawng mare na hpyen yen mung shawa ni mung machyi hkrum nga ai lam matut chye lu ai.
Dai majaw kan ana machyi ai sha n-ga, nkau hpyen yen ni gaw hka li du hkra machyi sawng wa ai majaw tsi rung hta tsi tsi hkam la ai ni mung nga ai re. Ya aten hpyen yen shara shagu hta tsi mawan garum ningtum ni, marang ning-gang ni ( မိုးကာ), lu hka san hte malu masha ni grai ra kadawn nga ai hpe matut chye lu ai.
Comments