Pajau Media
1.15.2025
KIA Pawnghpawm hpung ni zing madu da sai Waingmaw ginra kata na Ze Hkan mare mayan de Myen hpyen dap gaw aten n tam lak nak kaba gap bang ai lam, nbungli bawm wa jahkrat ai lam ni a majaw dai ginra hkan shanu nga ai Mung masha ni shim lam grai tsang nga ma ai lam chye lu ai.
“Kalang marang nga tim grai tsang ra ai. Nbungli lai ai hte gaw hkrit sai, mare hkan bawm kapaw ai hte kadai wa rai sai kun ngu myit tsang nna sha nga ga ai. Nbungli du ai hte kaduk de wa makoi ra ai. Nbungli bai n htang mat ai shaloi she bai pru wa lu ai,” nga nna Ze Hkan mare masha langai tsun ai re.
Waingmaw Ze Hkan mare mayan gaw KIA uphkang kata shanu nga ai raitim Myen hpyen dap a nbungli bawm grai naw tsang ra ai re. Dum nta hten za ai lam, Mung masha hkala ai lam ni grai nga ai re hpe mung chye lu ai.
Myen hpyen dap gaw Waingmaw hte dai ginra mare n kau hta shimlam grai shaja da nna aten masat nna sha hkawm sa ahkang jaw da ai re. San jep ai hte hpyen shamu shamawt ai lam ni mung grai galaw nga ai re. Ya aten Waingmaw muklum makau Muk Lwa mare lam braw kaw shagyit dung nna hkawm sa hkawm wa Mung shawa ni hpe jep joi nna hkawm sa hkawm wa aten masat da ai re hpe mung chye lu ai.
Shagyit hkan mawdaw cycle ni hpe gumhpraw hta ai lam, jahpawt daw hkying 6:00 Am kaw nna 9:00 am du hkra hte shana daw hkying 3:00 Pm kaw nna hkying 5:00 Pm du hkra sha mai hkawm sa ai re hpe mung chye lu ai.
“Shagyit gaw hkying hkum mi hpaw, hkying hkum mi bai pat nna galaw nga ma ai. Mawdaw la ni hpe gumhpraw hta sha ai lam ni galaw nga ai,” nga nna tsun ai re.
Myen hpyen dap gaw n dai laman nbungli hte Hpakant, Danai ginra sha n-ga Jinghpaw mung ginra n kau hta htim gasat ai lam ni grau galaw wa ai re. Yana zawn htim gasat ai majaw Mung masha law law asak si sum ai lam grau law wa ai re nga nna ginra masha ni tsun ai.
Shiga - Hpring
Commentaires