Pajau Media
19. 8. 2024
Jinghpaw mung Waingmaw ginra kata byin ai gasat gala majan a majaw Waingmaw Wuyan mare kaw na Hkanan mare de hpyen koi yen ai mung masha marai 900 a matu n-gu, malu masha hte tsi mawan garum ningtum hkyak hkyak ra kadawn nga ai lam chye lu ai.
Hpyen koi yen mung masha ni hta asak kaba sai gumgai dingla ni, ma chyu jaw kanu ni hte ma kaji ni law nga ai re hte ya aten n-gun rawng ai malu masha grai ra kadawn nga ai lam chye lu ai. Lanam ladaw re ai majaw nsan seng ai hka ni sha jai lang ra ai majaw kan ana byin ai masha ni mung law nga ai re hpe mung chye lu ai.
Hpyen koi yen mung masha ni gaw n nan koi yen wa ai aten malu masha hte tsi mawan ni mung lawm wa ai raitim hpyen yen ladaw shata masum jan wa sai re majaw malu masha ni mung ma wa sai re. Ya aten Hkanan hpyen yen dabang kaw nga ai mung masha marai 900 a matu hkyak hkyak garum ningtum ra kadawn nga ai re.
Ya aten Hkanan hpyen yen dabang kaw hkali hte kan a na byin ai masha law wa ai rai nna Hkanan hpyen yen dabang gaw lai wa sai April 7 ya kawn KIA pawng hpawm hpyen hpung ni hte Myen hpyen dap lapran gasat gala majan byin wa ai majaw hpyen koi yen wa ai gaw ya aten du hkra re hpe mung chye lu ai.
Comments