Pajau Media Channel
March 18, 2024.
Jinghpaw Mungdaw kata March shata (7) ya kaw nna byin hpang wa ai gasat gala majan a majaw hpyen koi yen wa ai Awng Mye (1,2) hte Shwe Nyawng Pin hkan na Mung mare masha hkying mi jan gaw ya aten malu masha hte jai lang na dinghku rung rai, bu hpun palawng, tsi mawan ni grai ra kadawn nga ai lam hpyen yen mung masha ni tsun dan ai kawn chye lu ai.
“Myen hpyen dap gaw hpunggyi jawng kaw sha yawng hpe majaw da ai, gara ma nsa shangun ai, tsun ga nga yang kata bu hpun palawng ni kaw na hkawt, num kasha ni shata shagu jai lang ra ai arai hpan kaw na hkawt, wa htu tsi, hte shadu lu shadu sha na di hka wan kaw na hkawt grai ra ahkyak nga ga ai” nga n na hpyen koi yen mung masha langai tsun ai.
Gasat gala majan lapran mung masha hkying mi jan gaw bat mi daram chyat rawng mat ai re hte hpyen koi yen mung masha ni bai lawt pru wa na matu (PCG) hte nawku makam masham hpung woi sara ni ta gindun nna march (13) ya shani chyat rawng nga ai kaw na Maina IDPs Camp de shadu la lu sai re.
“Maina camp kaw gaw moi kaw na mung hpyen koi yen mung masha ni shanu nga ai dabang shara mung re majaw kalang bai mung masha hkying lam bai shang wa rai yang gaw lam shagu grai yak hkak nga ai. Ma kaji ni hte asak kaba sai ni mung law nga ai majaw n kau gaw n-gu loi li lawm ai, hkum lawt daw sha hprawng yen wa ai ni mung lawm ai. Ya na masa hku yu ga nga yang aten galu rai yang tsang ra na masa re. Aten na na masha n dai ram law ai hpe jaw sha na matu mung nloi na re” nga nna Shwe Nyawng Pin kaw na koi yen wa ai mung masha langai shi a ningmu hpe tsun dan ai re.
Hpyen koi yen mung masha ni gaw asak lawt daw sha hprawng koi yen re ai majaw ya aten ra ahkyak ai lam gaw law law ra kadawn nga ai sha n-ga ya gan shanu nga ai camp kaw mung lai wa sai 2011 majan byin hpang wa ai kaw na koi yen nga ai shara mung re, mi kaw na masha law nga ai hta kalang bai gahtap koi yen wa ai ni hte rai yang Mung masha hkying lahkawng jan du hkra nga ai re hpe mung chye lu ai.
Hpyen yen dabang lithkam tsun ai hta ya aten Awng Mye (1,2) hte Shwe Nyawng Pin kaw na koi yen wa ai Mung masha n kau hpe Jam Ga nawku hpung de mung marai (600) jan, Nawng Hkyi buga de mung (700) jan nga ai hte ya Maina camp de du wa ai gaw hkying mi hkawt du wa ai re lam hte Maina camp kaw gan sa shanu ai ni gaw Waimaw Labang kahtawng de hprawng koi yen mat ai re hpe mung chye lu ai.
March (7) ya kaw na hpang ai Wunpawng mungdan shanglawt hpyen dap (KIA) a htu shadut htim gasat majan hpang hta Myen hpyen dap gaw Aung Mye (1,2) hte Shwe Nyawng Pin mare na Mung masha hkying mi jan hpe hpyen ninggang shatai nna shingdang da ai aten laman hpyen koi yen mung masha marai (4) daram du hkra asak si sum ai lam nga ai re hpe mung chye lu ai.
Myitkyina-Manmaw mawdaw hkrun lam dingyang hta chyat rawng nga ai mung masha ni hpe Simsa Lam Bawngban Hpung (PCG) kaw na lit nga ai salang ni, Nawku makam masham hpung woi ningbaw ningla ni shang lawm ai hte March (9) ya shani shawng ningnan lang numdaw mi hku nna marai (600) jan hpe lu shapraw la lu sai hte March (13) ya shani Numdaw lahkawng lang ngu na mung masha ni hpe lu shapraw la ai re lam mung chye lu ai.
Comments