Pajau Media
21.1.2025
Jinghpaw Mung Manje, Man Win Gyi mare hkan koi yen nga ai hpyen yen Mung masha htinggaw (800) Jan a matu Malu masha, Bu hpun palawng hte kaga rung rai tsi mawan ni hkyak hkak ra kadawn nga ai lam Man Win gyi hpyen yen mung masha langai tsun ai re.
Lai wa sai December shata daram kaw nna laja wa ai gasat gala majan a majaw Man win Gyi ginra de hprawng yen wa ai Mung masha ni gaw malu masha, bu hpun palawng, N ba Tsi mawan hte nga shara ni grai yak hkak nga ai lam chye lu ai.
Hpyen yen wa ai hta asak kaba ai ni, Ma hkum kanu ni, ma kaji hte aten galu machyi masha ni lawm wa ai majaw hkam ja lam a matu tsi mawan grai kadawn nga ai lam chye lu ai.
Hpyen koi yen wa ai ni gaw Manmaw, ManJe hte Nmawk Ginra hkan Mung masha ni rai nna gara shinggyim Uhpawng uhpawng ni a garum ningtum lam mung ya aten du hkra n lu ai majaw Ya hkak nga ai re lam chye lu ai.
Dai hpyen koi yen mung masha ni hpe RCM nawku hpung hte Hkalup nawku hpung lahkawng kaw nna Lit la yu nga ai re lam, RCM nawku hpung kata nga ai Hpyen yen mung masha htinggaw (483) hte Hkalup hpung maga nga ai hpyen yen ni gaw htinggaw (325) nga ai re lam chye lu ai.
Ya aten Manmaw ginra htim gasat majan gaw grai naw laja nga ai rai nna Phone matut mahkai n lu ai majaw shara shagu hkan tinang chye ai hku koi yen nga ai Mung masha ni ni Nta masha shada matut mahkai n lu na Yak hkak ai ni law ai re hpe mung chye lu ai.
Shiga – Zau Mai
Comments