Pajau Media
7 March 2025
Shata 3 jan pat da ai Waimaw na Hk.L.Y (58) dap shawng shagyit hte Wuyan P.T.Ts shagyit ni hpe bai hpaw ya ai hta shawoi na zawn hkawm sa mai ai rai tim jep joi ai ni grai galaw ai lam hpe mung masha ni tsun ai kawn chye lu ai.
“Shagyit bai hpaw ai gaw na sai, shawoi na zawn hkawm sa mai sai, rai tim jep joi ai gaw grau shachyat da ai. Cycle kaw pa hpa arai mung htaw nmai ai. Arai kade wa kaji taw tim yawng hpaw jep ai,” nga nna mung masha langai mi tsun ai.
Lai wa sai February 16 ya shani kawn dai shagyit hpe bai hpaw ya let lai hkawm na ahkang jaw da sai rai tim myen hpyen dap ni gaw Waimaw maga de lahkawng maga na hpyen shamu shamawt ai lam, hpyen htu shadut ai lam ni bai galaw wa ai majaw lai wa lai sa galaw nga ai mung masha ni, mawdaw cycle ni hpe jep joi ai grau galaw nga ai re hpe mung masha ni tsun ai.
Hk.L.Y(58)dap hte Wuyan P.T.Ts shagyit gaw Waimaw-Kanpaiti sa ai mawdaw lam ntsa kaw nga ai rai nna lai wa sai ten rai htaw mawdaw, cycle hte bu hkawm masha ni hpe lai wa lai sa ahkang pat kau ya ai rai nna mung masha ni gaw koi lam hku na sha yak yak hkak hkak hkawm sa lai wa ra sai re.
Dai shagyit hpe gaw lai wa sai 2024 November 25ya shani jinghpaw mungdan shang lawt hpyen dap KIA pawng hpawm hpung hte myen hpyen hpung ni a lapran majan laja nga ai ten myen hpyen dap ni kawn aten nmasat na lam pat ai re hte shata 3 jan hta dai shagyit ni hpe bai hpaw ya nna lai hkawm ahkang bai jaw ai re.
Maga mi hta mung myen hpyen hpung ni gaw Hk.L.Y (58) dap shawng kaw dap jung shara la nga nna hkawmsa hkawmwa lam tara shaja da ai sha n-ga mali hka rap na hkali daru ni rai nga ai ai Hkat Cho hte Nawng Hkying hkali daru ni hpe mung dai ni du hkra pat da ai re hte shim lam ni hpe shachyat da dingyang re.
Ya myen hpyen hpung ni gaw Waimaw muklum kaw sha n-ga jinghpaw mung kaw nga ai Puta-o muklum hte Danai shara hkan hpyen htu shadut wa nna nbungli bawm, drone ni hte sa gap gasat nga ai lam chye lu ai.
Shiga - Hpring
Commentaires