Pajau Media Channel
6th September, 2024
Jinghpaw Mung Waimaw ginra kata Nawng Hkying Ninghtawn kata na Hkang Bu hte Mali Yang mare masha ni galaw lu galaw sha ai Community Farming (CF) ginra ni hpe Ja Lauban ni du shang nna ja htu sha ai hta mung masha ni a galaw sha shara lamu ga ni hten za wa ai lam tsun ai.
“N ta htinggaw mi kaw E ka mi dut sai nga yang matut manoi dut na lam chyu re wa ai. Lamu ga madu ni nkam dut tim ja htu yang gaw lamu ga shi shi hten za wa ai, dai hku nga yang lamu ga ni sum machyi na malai jang dut jaw kau ra ai, dai hku hte CF ginra ni gau ngwi ngwi ma wa sai, lamu ga law malawng gaw ja lauban ni mari da ngut chyalu lamu ga sha re mat sai,” nga nna Mali Yang mare masha langai tsun ai re.
Ginra masha ni gaw hkai rem ai magam bungli hte Yi galaw ai lam, kaga hkai lu hkai sha bungli ni galaw sha nga ai lamu ga raitim ja htu magam bungli galaw ai bungli madu ni du shang wa nna ja htu shalau kau ai re majaw galaw lu galaw sha n mai mat sai re hpe mung chye lu ai.
Ja htu shalau kau sai lamu ga ni hta hkai lu hkai sha n mai mat ai re majaw Mung masha ni bai galaw sha ai lam n nga sai, dai ginra masha ni a matu shang gumhpraw ngu na mung ginra kata lata hte mai byin ai hku ja htu ja shap ai lam re, raitim ja htu lauban ni mari da ngut sai lamu ga ni hkan mare masha ni lata hte htu shap ai lam tsep kawp n galaw shangun ai re hpe mung chye lu ai.
Hkang Bu mare hte Mali Yang mare kaw Ginra masha htinggaw (50) grup yin galaw lu galaw sha let nga ai rai nna CF ginra E ka 100 jan grup yin hpe ja htu lauban ni bungli shang nga sai re lam tsun maram da ai re. Ja htu lauban ni du shang wa ai gaw 2023 shaning shawng daw kaw nna du shang wa ai rai nna ginra masha ni a lamu ga E ka mi kaw Sen 30 hte 40 lapran manu jaw nna ja htu sha nga ai re hpe mung chye lu ai.
Comments