U Shwe Min P.T.Ts Hpung Ni Kawn Asak Kaji Kaba N Lata Masha Lahkawn Ai Lam Laja Lana Galaw Wa

Pajau Media Channel

Waingmaw ginra hta dap jung shara jahkrat nga ai U Shwe Min P.T.Ts hpung ni kawn lisu amyu sha ni nta htinggaw shagu P.T.Ts galaw ra ai lam n dau wa ai hpang masha lahkawn ai lam ni dingyang galaw nga ai hta n dai laman gaw asak kaji kaba nlata lahkawn nga ai re hte lahkawn hkrum ai hta Gaw Ningja masha ni du hkra atik anang lahkawn hkrum ai lam ginra masha ni tsun ai.

Lai wa sai ten hkan gaw asak ram ai ramma ni hpe madung tawn lahkawn ai raitim n dai hpang daw de asak kaji ai ma ni hte Gaw ningja masha ni hpe du hkra lahkawn ai lam mung masha langai tsun ai.

“January 15 ya shani hkying 11:00 daram hta Wa Nya Lisu tsi mawan sr na kanam asak (15) ning re ai ma hpe dum nta kaw na nan rim woi mat wa ai. Shi hte rau asak mali shi jan re ai myi maga mi nmu ai salang hpe mung woi mat ai, wa rim ai shaloi nta jawn mawdaw ahpraw hte rim woi mat ai re” nga nna myi chyaw mu dat ai mung masha tsun dan ai re.

Ya na zawn P.T.Ts hpung ni asak kaji kaba n lata, gaw ningja ni hpe du hkra lahkawn la ai lam hte seng nna mung Salang Hkaw Tar tsun ai hta “asak kaji ni, Gaw ningja ni hpe rim nna nta na n-gun rawng ai langai ngai hte bai galai la shangun ai ladat hte laja lana rim nga ai re” nga nna tsun ai.

Waingmaw ginra mayan shanu nga ai Lisu amyu sha ni P.T.Ts hpung ni rim shatsang ai masa kaw nna koi yen lu na matu mung grai yak ai nga nna Salang Hkaw Tar matut tsun da ai. “Shanhte kaw Lisu dinghku htinggaw nta a yup tung jahpan nga ai, U Shwe Min gaw Lisu amyu sha yawng a gawng malai mung masa galaw ai wa re majaw Lisu P.T.Ts n galaw n mai nga nna lahkawn hkawm ai, kadai mung n gwi tsun, kadai mung kadai na ladat hte hprawng yen ra re” nga nna tsun ai.

Mung masha n kau tsun garu nga ai hta Tar Gaya, Awng Mye (1,2) ginra na mung mare masha ni nlu hprawng yen na matu Awng Mye (1) shagyit hta pru shang jep joi ai lam dingyang galaw nga ai re hte U Shwe Min P.T.Ts hpe ninghkap ai Lisu Mung masha n kau gaw tinang nga ai mare kahtawng kaw nna hprawng yen hkawm ai ni mung nga ai re lam chye lu ai.

Shiga- Bungshi

Photo credit