Pajau Media Channel
12nd July, 2024
Jinghpaw Mung Myitkyina Muklum a dingdung daw deng (28) tsan ai shara kaw nga ai Mali Yang San Pya mare hte Hkang Bu mare hta sawng dik ai hka hpyen tsin yam hkrum sha mat nna bai gaw sharawt masing galaw na matu Yak hkak nga ai lam chye lu ai.
June shata htum hte July praw laman byin lai wa sai Hka hpyen tsin yam a majaw Mali Yang mare kaw na htinggaw 40 grup yin hka lim hkrum ai hte Hkang Bu mare gaw mare ting ngu na daram hka lim hkrum mat ai re lam ginra masha tsun ai.
“ Nta htinggaw 40 daram rai na re, nta ting hka lim hkrum ai, dai kaw dum nta lahkawng masum daram gaw Wut shadaw du hkra daw mat ai, ya shanhte nga shara n nga ai, kaga nta ni gaw hka lim mat ai raitim san seng lam galaw na mai wa nga ai , raitim Wa Lawng, Dum Su lawng, Nam Dum hte Wang shakum ni yawng Hka sawt mat ai, dum su n kau mung Hka kaw lawm mat ai” nga nna Mali Yang mare na Salang langai tsun ai.
Mali Yang mare Lahta kaw nga ai Hkang Bu mare gaw Mare ting ngu na daram Hka lim mat ai hta n ga Hka hpyen hpe sawng dik madang hkrum sha ai rai nna, Mung masha htinggaw Latsa grup yin shanu nga ai mare langai re.
“ Anhte mare a lahta na Hkang Bu mare gaw grau sawng ai re, shanhte gaw mare ting ngu na daram hka lim mat ai, Hka bai hkyet mat ai ten sum machyi htenza ai lam grai law ai, Mare ting grai yak hkak nga ma ai” nga nna matut tsun dan ai re.
Mali Yang mare kaw nta lahkawng gaw yawng ngu na daram Hten za mat ai, dai hten za mat ai dum nta masha ni gaw ni nawn ai jinghku nta hte mare kata na htunghking rung kaw gan shanu nga ai re hpe mung chye lu ai. Mali Yang San Pya mare gaw Mali zup Tang Hpare mare makau kaw nga ai rai nna Htinggaw 1,400 grup yin hte mare masha ni pawng hpawm nna nga ai ginra langai re,.
Mali Yang mare gaw Mali zup madim masing a majaw 2010 ning hta Dawng Pan, Awng Ja mare kaw na mung masha ni hpe asuya kawn htawt sit shangun ai hte bai gaw de da ai mare langai re hpe mung chye lu ai.
댓글