Tang Gu Tang P.T.Ts Hpyen Hpung Ni Shamu Shamawt Nga Ai Lang Se Ginra Hpe KIA Pawng Hpawm Hpyen Hpung Ni Zing Madu

Pajau Media

11.11.2024

Putao ginra Tang Gu Tang P.T.Ts hpung ni shamu shamawt nga ai Miwa jarit Lang Se ginra hpe KIA pawng hpawm hpyen hpung ni November 10 ya shani hta zing madu la sai re lam KIO shiga magam dap lit hkam tsun shagrin da ai hpe shiga hta tang madun da ai re.

Lang Se ginra hta Ja grai pru ai lam mying gumhkawng ai shara rai nna Putao ginra na n-gun ja ai Ramma ni, Wa Ngan ni law malawng gaw Lang Se de Ja htu bungli sa galaw ma ai re.

Putao ginra sin hpyen hpung rai nga ai P.T.Ts ningbaw Tang Gu Tang kawn Lang Se ginra shimlam hpe grau galaw sa wa na matu lai wa sai October shata laman n dau laika shapraw lai wa sai re hte shata mi na ai hpang KIA pawng hpawm hpyen hpung ni zing madu kau ai re hpe mung chye lu ai.

Lang Se ginra gaw Slg Zahkung Ting Ying Laksan Uphkang ginra P.T.Ts hte Tang Gu Tang Hkawng Lang Hpu P.T.Ts ni pawng hpawm shara jahkrat nna makawp nga ai ginra mung re lam chye lu ai. Ya aten jarit mayan ginra yawng ngu na daram hpe zing madu da lu sai rai nna Kanpaiti ginra gaw n dai laman Sinat n sen ni zim nga ai masa re.

KIA pawng hpawm hpyen hpung ni kawn jarit mayan matut manoi htim gasat wa ai hta Jarit sin P.T.Ts n kau lak nak jahkrat nna KIA maga pawng hpawm wa ai lam ni nga ai hta November 4 ya shani hta mung P.T.Ts marai 100 jan lak nak jahkrat ai majaw Gang Fang mare hpe htim gasat n ra ai sha zing madu la lu sai re.

Jarit mayan gasat gala majan a majaw Miwa maga kawn Jarit chying hka pat da ai hta ya aten Jarit mayan shanu nga ai Mung masha ni gunrai taw ai, manu hpu ai mayak ni hkrum katut nga ma ai re. KIA pawng hpawm hpyen hpung ni jarit mayan hpe September shata htum maga kaw nna htim gasat wa ai hta law malawng hpe zing madu la lu sai rai nna Kanpaiti ginra langai sha ngam sai re lam chye lu ai.

KIA gaw gumshem lai ladat hpe htum hkra gasat na ngu ai masing kata matut manoi htim gasat sa wa na re lam, jarit mayan yawng hpe zing madu kau lu yang she simsa na re majaw matut manoi htim gasat sa wa na re lam mung KIA maga kawn tsun da ai re hpe mung chye lu ai.