Pajau Media Channel
July 20, 2024
Putao, Lung Sha Yang ninghtawn kata na Tan Ja mare kaw Hk.L.Y 46, Tatma 88 hte P.T.Ts pawng hpawm hpyen hpung ni shara jahkrat nga ai shata lahkawng daram rai sai re hte mare kata hkawm sa hkawm wa lam jahkrit shama ai lam, mare kata kam ai hku chyinglau nga ai lam mare masha ni tsun ai kaw na chye lu ai.
Mare kata shanhte kam ai hku chyinglau nga ai sha n-ga mare masha ni hpe jahkrit shama ai lam ni galaw nga ai majaw mare masha ni hkrit tsang let sha nga ra ai lam mare masha langai tsun ai .
“Shahte mare kaw nga ai majaw mare masha ni gaw hkawm sa hkawm wa, galaw lu galaw sha grai yak mat sai. Ya du hkra shahte sha mayu ai ni yawng hpe kam ai hku sat sha na nga ma ai. Mare salang wa kaw htinggaw mi u langai n jaw n mai nga hpyi shagyeng ai zawn re ai ni galaw ai, mare masha ni kadai n mai hprawng ai, hprawng yang mare wan nat na nga jahkrit shama ai.”
Dai myen hpyen dap pawng hpawm hpung ni gaw June shata praw daram kaw nna Sumpyi Yang, Sumpra Bum ginra de htu lung wa ai hpyen hpung langai re hte June 8 ya shani Tan Ja Mare makau kaw du nga ai aten KIA-KPDF pawng hpawm hpung ni kawn htim gasat ai majaw htingnut wa ai hta Tan Ja mare de shang wa ai re kaw na ya aten du hkra nga ai re lam matut tsun ai.
“Dai shani gasat gala byin ai lak nak kaji kaba gap hkat ai, dai kaw Myen hpyen dap maga sum machyi ai lam nga ai. Hkala hkrum ai ni mung law ai majaw htingnut wa ai re, mare kaw na mung masha ni na nta hkan nga ai shata lahkawng jan wa sai, shawng de matut mung n lu hkawm mat sai, gasat gala byin ai shani mung mare kaw na la marai lahkawng hpe adup zing ri ai lam nga ai n -ga shan a jinghku marai ( hpe mung rim zing da ai lam ni galaw ai re.”
Tan Ja Mare kaw shara jahkrat nga ai Myen hpyen dap gaw n-gun (80) daram nga ai re hte mare masha ni shimlam n lu yak hkak nga ma ai re hpe mung chye lu ai. Tan Ja mare gaw mung masha htinggaw (110) daram nga nna Myitkyina-Putao hkrun lam ntsa na mare langai re hpe mung chye lu ai.
Shiga – Mali HKu
Comments