Pajau Media Channel
13th July, 2024
Majan a majaw hpyen koi yen hkawm ra ai raitim Ma ni a hpaji lam hpang hkrat n mai ai re majaw du nga ai shara kaw Jawng hpaw sharin na matu masing jahkrat galaw wa ai hta Jawng Lang arung arai grai ra kadawn nga ai lam chye lu ai.
Ma ni hpaji hpe matut sharin la lu na matu mahkrun tam shakut nga ai hta Jawng Barrek lahkawng hpe Kawa hte Mu ga jai lang nna gaw gap la ngut sai, Lapran tsang du hkra hpaw sa wa na re, Jawng lang arung arai dung lahkum, white board kaw na hkawt n lu shi ai re raitim mai byin ai masa hte du wa na bat kaw na gaw hpaw sharin hpang sa wa na re lam Sumpyi Yang hpyen yen mung masha langai tsun ai.
“Jawng hpe du wa na bat kaw na she hpaw hkyen ai, Jawng lang arung arai ni mung n hkum shi ai, Hpa mung n nan kaw na jinghkum la ra ai re majaw yak ai lam law law re, raitim mai byin ai masa hte hpaw sharin hpang na matu galaw da ai, Jawng komiti hku na mari da ai arai ni pyi n lu htaw la shi yang Lam bai pat mat di n lu htaw la shi ai, aten gaw lai she lai wa ai re majaw mai byin ai hku hpaw na matu galaw wa ai re”
Shang Lawt Asuya kaw nna mung hpaw na ahkang gaw jaw ai raitim ta tut hta n dep n hkap lam ni law law re, madung gaw jawng ma kanu kawa ni hku nna atsam dat ai hte galaw hpang wa ai re, Hpaji sharin na Jawng Sara, Sara Num ni mung law law ra nga ai re lam mung chye lu ai.
“Shang lawt asuya ginjaw hpaji dap kaw nna mung jawng hpaw mu nga ai hte maren hpaw na matu gaw rai sai, raitim shanhte gaw jawng lang arung arai kaw na hkawt gara hku galaw na ngu ai hpe gaw hpa tsun ai lam gaw n nga ai, gau ngwi shajin la ga gaw nga tim ya du hkra gaw hpa n nga wa shi ai le, sharin Sara/ Sara Num ni gaw buga hkan na tsang shi awng da ai ni hte sharin achyin ai lam hta myit lawm ai ni hpe Kanu Kawa ni shatsam ai hte hpang na hku re ”
Sumpyi Yang hpyen yen dabang kaw hpaji sharin hkam la na jawng ma Lahkawng tsa jan nga ai hte jawng ma ni lang na araung arai, Jawng lang arung arai ni mung grai ra kadawn nga ai re, Sumpyi Yang hpyen yen mung masha ni gaw majan a majaw lai wa sai May shata daram kaw nna Nam de hprawng koi yen ra mat ai hte Hpyen yen Mung masha Hkying mi jan re lam mung chye lu ai.
Comments