Pajau Media Channel
June 12, 2024
Lai wa sai March shata kaw nna shata masum daram Nam maling de hpyen koi yen mat ai Sumpra Bum ginra masha ni June (10) ya kaw nna tinang buga dum nta de wa nga magang nga sai lam hpyen koi yen masha ni tsun ai kaw na chye lu ai.
“Sumpra bum mare dum nta de wa ai gaw lahkawng ya ram re sai, a rai ni htawk la rai na, dum nta jasan jaseng na wa nga shanu hpang magang sai, shimlum lam hte seng na myit gaw tsang ai, Lanam ta hta Nam maling kata kaw grau jam jau na tsang ai,Lanam ta hta tinang dum nta kaw sha pyi Maja let wa nga mai na kun ngu na hkam la let shanu hpang wa ai re” nga nna sumpra bum ginra masha tsun ai.
Sumpra Bum ginra masha ni Nam de koi yen ai hkawm ai gaw shata (3) daram re sai hte nam maling kaw yak hkak lam law law re hte Ma ni jawng lung na matu mung yak hkak na masa nga ai majaw Lanam ta nam kata kaw grau yak hkak malai tinang buga de maja let wa nga ga ngu ai masa re, Shanglawt asuya kaw nna mung maja let nga na matu matsun ai lam ni nga lam tsun ai re.
“ginra masa gaw grai shimlum ai masa gaw nre, shanglawt ni hku na mung grai shimlum sai, mai wa sai nga gaw ntsun ai, raitim mung maja nna she nga ga ngu ai hku na matsun ma ai re, Nam maling kaw Ma ni a matu Jawng hpaw na lam ni mung masan n sa yak hkak lam law law nga na re majaw tinang buga dum nta de maja let ng anna Jawng ni hpe hpaw na masing ni mung nga ai hkyen lajang da ai lam ni mung nga ai ” nga nna mung tsun ai re.
Sumpra Bum kaw Hpaji jawng hpe jawng kaji kaw nna Tsang (12) du hkra hpaw na matu shanglawt asuya kaw nna mung lam masan nga ai hte maren du na bat kaw nna gaw hkrang shapraw galaw sa wa na masing gaw nga ai lam chye lu ai.
Hpyen koi yen mung masha ni buga de wa nga ai raitim grai shimlum sai ngu na wa ai gaw nre,ntsa hpyen hpe myit tsang ra ai nga ai hte hkrun lam ni mung naw pat da ai re majaw malu masha ni yak hkak wa na hpe mung myit tsang ai. Sumpra bum ginra masha ni gaw Bum Yi Hkyen let kan bau ai hta dai ning gaw hpyen koi yen ra mat ai majaw yi atsawm rai n lu galaw ai, shaning garai n htum shi yang malu masha yak hkak wa na hpe myit tsang ai nga nna ginra masha ni tsun ai re.
Comentarios