Pajau Media
7.11.2024
Gasat gala majan zim ai hpang Mung masha ni bai wa nga sai Sumpra Bum Muklum kata gasat gala majan hpang ngam kau da ai lak nak kaba si ni, hkam bawm ni naw ngam taw ai hte n dai ni hpe lit nga ai asuya kawn lawan jasan ai lam galaw na matu Mung masha ni lang hte lang tsun da ai raitim ya du hkra n lu galaw ya shi ai lam Sumpra Bum ginra masha tsun ai.
“Majan ten gap dat ai lak nak kaba ni ga kaw jung ngam taw ai ni naw nga ai. Sumpra bum Muklum kata hkan re. N dai ni hpe Jasan ya na matu asuya hpe lang hte lang gaw tsun dan da ai re wa rai n galaw ya nga ma ai, tang madun da ai gaw nga ai, dai lawan galaw kau ra nga ga ai.”
Sumpra Bum ginra hpe htim gasat zing madu la ngut ai hpang ginra masha ni bai wa nga ai shata kru daram na sai raitim ya du hkra Muklum kata gasat gala majan hpang ngam kau da ai ga hkan jung taw ai Hkam Bawm ni n lu jasan shi ai majaw hkawm sa hkawm wa kaw na hkawt grai sadi maja nna nga ai lam ginra masha ni tsun ai re.
KIO Uphkang sai ru hte Uphkang nga sai Sumpra Bum muklum kata majan hte seng ai laknak bawm hkyep ni hpe lit nga ai asuya kawn mung lawan galaw ya na hpe Mung masha ni ra sharawng nga ma ai re. Sumpra Bum ginra kata ya aten gaw simsa nga ai re, raitim n dum shami Myen hpyen dap kawn bawm wa jahkrat bun ai zawn re ai masa lam ni hpe gaw naw myit tsang ai lam ginra masha ni tsun ai re.
Sumpra Bum ginra masha ni gaw Yi Sun galaw sha na ten hpyen koi yen ra ai re majaw malu masha hte seng nna lit nga ai shang lawt asuya kawn lit la ya nga ai lam, Mung masha ni gaw aten dep ai daram Bum Yi hpe galaw nna hkai shadut da lu ai lam ni nga ai raitim dai ning gaw Bum Yi Mam ni Yu grai sha ai majaw Mam n li n lu tawn na madang byin nga ai lam ginra masha ni tsun ai kaw na chye lu ai.
Comments