Pajau Media Channel
28th August, 2024
Putao ginwang ginra Hpung Ngai Yang hpyen koi yen dabang kaw hpaw sharin nga ai hpaji jawng hta sharin sara num/la n law ai lam chye lu ai.
Majan a majaw Sumpyi Yang mare, Wa Dat hte Ntsi Yang mare kahtawng masum kaw nna mung masha hkying mi jan gaw lai wa sai June praw kawn Hpung Ngai Yang de koi yen wa ai re. Hpyen koi yen ai ladaw raitim ma ni hpaji daw mat na tsang ai majaw mai byin ai masa hte hpaji jawng hpe hpaw nga sai raitim sharin sara num/la n law ai re lam hpyen koi yen mung masha ni tsun ai.
“Hpaji jawng hpe KIO asuya uphkang ai n pu kaw tsang ( du hkra hpaw da sai re. Ma shapan jawng n lu hpaw shi ai, lu hpaw hkra mung shakut dingyang re. Ma ni a hpaji jawng hte seng na ra ai lam law law re. Sharin sara num/la n law ai, ya aten sharin sara marai 11 nga ai, dai ni hpe makam masham nawku hpung hku nna madi shadaw ya ai re,” nga nna hpyen yen mung masha langai tsun ai re.
Hpung Ngai Yang hpyen yen dabang kaw KG kaw nna tsang ( du hkra jawng ma yawng marai (200) jan nga ai hte ma shapan jawng lung ram sai ma ni mung marai (36) nga ai raitim ma shapan jawng hpaw na matu naw yak hkak nga ai re lam mung chye lu ai. Jawng hpe mai byin ai masa hte hpaw nga sai raitim jawng lang arung rai n hkum shi ai hta hkrun lam mayak a majaw jawng lang arai ni mung n lu htaw la shi ai lam mung tsun ai.
“Jawng kata lang ra ai arai hte jawng ma ni lang na arai ni mung n law ai. Hkrun lam mung grai yak mat ai re majaw mung lawm ai. Jawng hpe mung mai byin ai masa hte kawa ginsup sha galaw da ai re majaw lanam ladaw hta marang htu sawng wa ai aten hkan laika sharin na matu mayak nga ai.”
Dabang kata na tsang kaba sai jawng ma ni gaw KIO uphkang ginra kata na lahta jawng ni hte Myitkyina ginra hkan na lahta tsang jawng ni hkan matut lung ra ai hta jawng htawt lak mat hpe Putao de du hkra wa la ra ai re hpe mung chye lu ai. Ya aten Hpung Ngai Yang hpyen yen dabang kata lanam ladaw malu masha, tsi mawan, bu hpun palawng ni ra kadawn nga ai lam chye lu ai.
Shiga – Mali Hku
Comments