Pajau Media Channel
18th March, 2024
Sumpra Bum ginra Myen hpyen dap (46), P.T.Ts pawng phawng hpyen hpung ni hpe KIA,KPDF hpung ni htim gasat zing madu ai hpang Myen hpyen dap kawn Putao ginra, Lung Sha Yang, Sumpyi Yang mare kahtawng ni hta shana pru hkawm ahkang pat da ai lam n dau wa ai re.
“Myen hpyen dap gaw mare uphkang salang ni hpe laika shadu wa ai. Mare kata kaw na ni shana hkying 7:00 PM hpang kaw nna shinggan pru hkawm ai lam n galaw na matu n dau wa ai re. N dau wa ai hpang shana pru hkawm ai majaw byin wa ai manghkang hpe mare salang ni kawn mung nlu lit la ya ai” nga n na tsun ai.
Lung Sha Yang Ninghtawn ngu ai kata kaw mare kahtawng (9) lawm ai re, dai mare kahtawng ni kaw nna mare salang ni hpe shana la nna March (16) ya shani Lung Sha Yang kaw dung ai Myen hpyen dap lit nga salang wa kawn zuphpawng shaga la nna tsun sadi jaw wa ai re lam chye lu ai.
“Myen hpyen dap maga na gaw Myen Hka Jaw Poi n du shi ai laman hpyen la hkawn ai lam ni galaw wa na re lam tsun ai. Shana aten pru hkawm ai ni hpyen lahkawn ai kaw lawm ai zawn re ai hte kaga manghkang ni byin yang anhte mare salang ni kaw na mung hpa tsun na lam n nga ai” nga nna mung tsun ai re.
Sumpyi Yang mare kaw mung shana (6:00) PM kawn jahpawt hkying (6:00) AM lapran shinggan pru hkawm sa ai lam n galaw na matu Myen hpyen dap aming jahkrat da ai. Ginra mayan gasat gala majan byin wa yang mung hprawng yen ai lam n galaw na matu mung tsun da ai lam ni nga ai re hpe mung chye lu ai. Ya aten Myitkyina - Putao lam mayan gasat gala majan naw laja nga ai aten Myen hpyen dap maga kawn Sumpra Bum hte Sumpyi Yang maga de hpyen n-gun jat bang nga nna hpyen shamu shamawt ai lam ni dingyang galaw nga ai re hpe mung chye lu ai.
Shiga – Mali Hku
Comments