Pajau Media
13th February, 2025
Putao, Sum Pyi Yang mare na ginra masha ni Hpung Ngai Yang hpyen yen de hprawng yen nga ai gaw shata 9 hpring wa sai rai nna nga shara, lu hka hte tsi mawan ni ra kadawn nga ai re hte mare de lawan wa mayu ai lam hpyen yen mung masha ni tsun ai.
Sum Pyi Yang ginra masha ni gaw ginra kata majan nbyin ai raitim Sumpra Bum zing majan a majaw Hpung Ngai Yang hpyen yen de hprawng yen nga ra ai rai nna hprawng yen ai aten na wa sai re hte lam shagu hta yak hkak nga nna mare de bai wa mayu ai lam tsun ai.
“Ya mare masha ni a myit masa gaw mare de grai wa mayu ai. Kaga hpyen yen mare ni zawn mare hten mat na, mare dum nta htenza mat na tsang taw nga. Mare de wa mayu ai myit hkrai, mare de hpyen wa n nga yang, nta mai wa yang lawan wa mayu ai. Dinggai dingla ni yawng mare de wa mayu ai myit hkrai re,” nga nna Hpung Ngai Yang hpyen yen mung masha langai tsun ai.
Hung Ngai Yang hpyen yen hta Sum Pyi Yang, Ntsi Yang, Wa Dat mare na mare masha ni hpyen yen nga ai rai nna Sumpra Bum hte ni ai a majaw Sumpra Bum zing majan hta Hpung Ngai Yang hpyen yen de hprawng yen ra mat ai re hte Feburary 11ya shani gaw hpyen yen ladaw shata 9 Hpring sai re.
“Shawng de hprawng ai gaw Sumpra Bum majan a majaw anhte Sum Pyi Yang, Ntsi Yang, Wa Dat ni gaw Sumpra Bum jarit kaw nga ai. Jarit kaw re majaw yen kau ra ai. Jahkring mi yen ai. Nam de tingnang na tinang ginsum gap da ai de hprawng ai ten hta Shang Lawt Asuya ni hku na nanhte bat mi laman yen ra ai, anhte dai de majan masing nga ai nga ai majaw yen ai kaw na ya dai ni du hkra majan masing mung nnga ai, majan mung n gasat ai, hpa mung nbyin ai sha mare de nmai wa, hprawng yen kau ra ai madang de re majaw mung shawa ni myit npyaw nga ai,” nga nna ntsa na hpyen yen mung masha sha matut tsun ai.
Ya ten hpyen yen camp hta nta ginsum ni hten wa, tsam wa, hka ni hkyet mat wa, moegar (မိုးကာ) ni tsam wa ai majaw yakhkak taw nga ai rai nna, hkamja lam a matu tsi mawan ni mung ra kadawn nga ai lam tsun ai.
Hpyen yen ni gaw hpyen yen ai ladaw na wa ai majaw lam shagu hta yakhkak nga nna mare de simlum lam nga yang lawan wa mayu sai lam tsun ai.
Hpung Ngai Yang hpyen yen camp hta Sum Pyi Yang, Ntsi Yang hte Wa Dat mare na mare masha ni nta htinggaw (245) kaw na Ła(625), Num(638) yawng pawng marai (1263) hpyen yen shanu nga ai re.
Shiga - CJ
Commenti