Pajau Media
December 23th, 2024.
Jinghpaw mung, Shwe Gu ginra kata hta KIA hte Gumshem Myen hpyen dap ni gasat poi byin ai lam nnga ai raitiim, Myen hpyen dap kawn hpyen shamu Shamawt ai lam ding yang galaw nga ai sha n-ga, ginra masha ni a Nga Lawng ni hpe mung, wan nat jahten kau ya ai lam nga ai hpe chye lu ai.
Gumshem Myen hpyen dap ni gaw Shwe Gu ginra Masha ni shanu nga ai Malihka mayan de hpyen n gun law law hte hpyen shamu Shamawt nga ai rai nna, hkawm sa hkawm wa mungshawa ni hpe mung hpyen ning-gang shatai na matu rim woi la ai lam, jahkrit shama shagyeng ai lam, galaw nga ai re hpe ginra masha ni tsun dan ai re.
Shwe Gu ginra hta Myen hpyen dap hte KIA pawng hpawm hpyen hpung ni lapran hkrum katut gasat gala majan byin ai lam nnga ai raitim, ndai laman ginra masha ni a dum nta hkan pru pru shang shang, sawk jep ai sha n-ga, KIA/KPDF hpyen hpung ni hte Matut mahkai nga, n-nga san jep ai lam, jahkring hkring sawk jep ai hpe mung ginra masha ni tsun dan ai.
Ginra masha ni gaw, Myen hpyen dap kawn ya na zawn san jep sawk sagawn ai lam, nga wa ai majaw shim lum lam nnga, grai hkrit tsang nga ai lam chye lu ai.
Comments