Pajau Media
10 February 2025
Myitkyina muklum Shatapru lawk kaw nga ai Myet (မြတ်) gumhpraw shaw, htawt bang seng na seng madu February praw 4 ya shani hta gumhpraw law law masu maw sha nna hprawng hkawm ai mabyin hpe gumhpraw masu sha hkrum ai ni tsun dan ai kawn chye lu ai.
“Dai praw 4 ya shani hta shi nnga sai. Ngai sa ai shani gumhpraw nnga taw na gumhpraw shawng htawt bang na hpang shani she shaw la u nga tsun na hpang shani sa yang shi nnga taw sai. Mi jau na Cycle hte le mat sai da. Ngai mung shawoi galoi mung htuk taw ai re majaw kam na re nga” nga nna masu sha hkrum ai masha langai tsun ai.
Gumhpraw masu sha hkrum ai ni tsun dan ai hta seng madu gaw num rai nna gumhpraw shaw htawt bang na matu sa wa ai ni hpe gumhpraw shawng jau htawt shangun ai hku na masu sha ai hte ya na zawm masu sha hkrum ai ni grai law ai re hpe tsun ai.
“Masu sha hkrum ai ni ngai chye ai hte nga yang marai 5 ram nga ai. Marai langai mi gaw sen 104, langai gaw sen150, ngut yang langai gaw sen 10, langai gaw sen 55 hte ngai na gaw sen 30, sen 80 hte hpang de marai kade naw nga ai kung gaw nchye,” nga nna lahta na masha kawn matut tsun ai re.
Gumhpraw masu hkrum ai chye ai hte Phone set san ai shaloi gumhpraw masu ai wa gaw dinghku mayak a majaw ya na zawn galaw ai hte hkoi lang da ai hku myit la shangun ai hte lani mi hta bai wa na nga nna nhtang tsun ai re.
Dai gumhpraw masu hprawng mat ai num gaw mi shawng de mung gumhpraw tsa hku na masu sha ga ai re hte nta ni dut na bai wa ai hpe mung chye lu ai.
Shiga - Zau
Comments