Shata Mi Laman Myen Hpyen Dap Kawn Shinggyim Ahkaw Ahkang Tawt Lai Ai Hte Seng Nna NUG N Dau

Pajau Media

April 24.2025

Myen hpyen dap gaw March shata laman Shinggyim ahkaw ahkang tawt lai ai lam (631) lang tawt lai ai re nga nna NUG asuya kawn ndau da ai kaw na chye lu ai.

Shinggyim ahkaw ahkang tawt lai ai lam hta mungdan masha ni madu ai arung arai jahten ai lam, atik anang shangun ai lam, tara n lang ai hku sat nat ai lam, gasat gala majan n nga ai sha mung masha ni nga ai ginra de lak nak kaba, nbungli bawm gap bun ai lam ni hte kaga shinggyim ahkaw ahkang tawt lai ai lam ni galaw ai re.

Shinggyim ahkaw ahkang tawt lai ai lam hpe Jinghpaw mung kata (17) lang, nbungli hte htim gasat ai lam (9) lang galaw ai re. Myen mungdan masa hku rai yang mara kata mung masha ni hpe dingsa gasat ai lam (156) lang nga sai hte nbungli a majaw hkala hkrum ai mung masha (377), asak si sum ai (202) nga ai rai nna dai hta asak n hpring ai (18) ning n pun a Ma ni mung marai (25) lawm ai lam tsun da ai re.

Jinghpaw mung kata na nbungli a majaw asak si sum ai mung masha marai (45) nga ai hte Myen mung madang hku rai yang shata mi laman law dik re. Myen hpyen dap gaw April 30 ya du hkra gasat gala majan gan jahkring ai lam n dau da tim April 24 ya shani du hkra Jinghpaw mung ginra hte Myen mungdan kata nbungli, Drone ni hte htim gasat nga dingyang re.

Shiga- Zau