Pajau Media Channel
June 25, 2024
Jinghpaw mung, Putao ginra hta mani kawn phone internet line yawng bai lu lang sai rai nna, gat seng hte pump jak sau seng ni yawng bai hpaw dut sai re hte maw daw, cycle law malawng mung shawoi na zawn hkawm sa sai re lam, ginra masha ni tsun shana ai kaw na chye lu ai.
Shata mi daram pat hkum da ai phone internet line yawng gaw mani June shata 24 ya shani kawan bai hpaw ya sai raitim Mytel sim card langai sha rai nhpaw ya shi ai re.
“Phone line yawng gaw mani kaw na bai lu sai, mai lang sai. Internet line lang yang chyawm nau nkaja shi ai. Line gaw Atom lu yang MPT nlu ai. MPT lu yang Ooredoo nlu ai. Ooredoo lu yang Atom bai nlu, dai hku gaw rai taw nga ai. Mytel chyawm tsep kawp nlu shi ai ga re,” nga nna Putao ginra masha langai tsun ai.
Bai nna, Putao myo gaiwang kata hta jak sau seng kaba hte gat seng kaba ni yawng shawoi na zawn sha bai hpaw dut nga sai rai nhtawm n-gu, sha sau, jum, shakau hpraw, shakau hkyeng hte jak sau gun rai manu ni gaw grai law hkra yawm wa sai lam matut chye lu ai.
Shawoi hkying kru (6,000) dut ai jum ya aten hkying mi manga tsa (1,500), sen masum (300,000) dut ai n-gu buk mi ya aten mun matsat (80,000), liter mi hta mun manga (50,000) dut ai jak sau ya aten hkying matsat manga tsa (8,500) du hkra hkrat yawm wa sai re hpe mung matut chye lu ai re.
Comments