Pajau Media
8th March,2025.
Hpakant ginra Jahtu Zup Wahka jamaw makau na KIA dap langai hpe Wa Ra Zup Min Zay Thant Pyi Tu Tsit hpung ni hte Gumshem Myen dap pawng hpawm hpyen hpung ni kawn n-gun law law hte htu shadut htim gasat lung wa ai majaw tat sum kau ai lam chye lu ai.
Lai wa sai March shata praw 6 ya shani Min Zay Thant pawng hpawm hpyen hpung ni kawn nbungli, drone sha n-ga hpyen n-gun law law hte htu shadut lung wa ai rai nna, hpyen hpung marai 8 sha nga ai KIA hpung ni, hpyen n-gun nbung ai majaw hting nut kau ra ai lam chye lu ai.
KIA maga kawn dap kasha hpe hkrat sum kau ai sha n-ga lak nak machyu pala hte rau hpyen ma langai mung asak si sum lawm mat ai re.
Dai sha n-ga Hpakant ginra hta Gumshem Myen hpyen dap gaw nbungli, lak nak kaba ni gap shadam gasat ai lam jahkring hkring galaw nga ai majaw KIA kawn ginra masha ni hpe hpyen koi yen mai ai kaduk htu shajin da ra na lam mung, tsun shadum da ai re hpe matut chye lu ai.
“Kaduk ni htu shajin da shangun ai, myen hpyen dap ni nbungli hte jahkring hkring sa gap gasat ai lam, hpyen masa kalang bai shaja hkat wa ai majaw gasat poi byin wa na hpe tsang ai majaw re.” nga nna Hpakant ginra masha langai tsun dan ai.
Min Zay Thant Pyi Tu Tsit hpyen hpung ni gaw mare kata hpyen masa shamu shamawt ai lam hpe ding yang galaw nga nna, lak nak kaba gap shadam nga ai sha n-ga, ginra masha ni manu shadan tawn ai akyi hpyi bum ntsa hkan mung dap jung shara la nga ai lam chye lu ai.
Gumshem Myen hpyen dap hte Min Zay Thant pawng hpawm hpyen hpung ni gaw Monyin, Danai-Lido lam hte Myitkyina lahta maga de daining shaning ningnan aten kawn hpyen masa shajin ai lam ding yang galaw nga ai sha n-ga, hpyen lahkawn ai lam ni mung galaw nga ai re hpe ginra masha ni shana wa ai kaw na chye lu ai.
Shiga - Zau
Comments