Pajau Media Channel
June 18, 2024
KIO uphkang ginra Sha-It-Yang hpyen yen dabang hta ga shing but gyi ru wa ai majaw hpyen yen dum nta nkau hten za mat ai lam chye lu ai.
Mani June shata nhtoi 17 ya shani hkying 11:30 AM aten hta marang htu kaba wa ai majaw, Sha-It-Yang hpyen yen dabang hta ga shing but gyi ru wa ai hta, hpyen yen dum nta lahkawng hten za mat ai re.
Ga shing but gyi ru wa nna dum nta hten za hkrum mat ai sha n-ga, lai wa lai sa lam ntsa hkan mung ga gyi ru nna lam pat mat ai majaw dai shara nga ginra masha ni hkawm sa hkawm wa yak hkak ai nga nna seng ang ai ni tsun ai.
Ya na zawn ga gyi ru wa ai majaw, hpyen yen mung shawa ni gaw, tinang hte ni nawn ai jinghku jingyu dum nta ni hkan shing byi nga ai re hte ga gyi ai majaw masha hkra hkala ai lam gaw n-nga ai re hpe chye lu ai.
Sha-It-Yang hpyen yen dabang gaw, shaning shagu ngu na daram ya na zawn lanam ta aten ladaw du shagu bum gyi ru ai lam, ning gam gyi ru ai lam ni jahkring hkring byin chye ai shara mung rai nhtawm, KIA hte gum shem Myen hpyen dap lapran, majan a majaw hpyen koi yen nga ai dabang mung re.
Dai majaw ga ning gam gyi nna dum nta hten za hkrum ai mung shawa ni gaw, jinghku jingyu dum nta hkan shing byi nga ai raitim mung ya yang nga shara a matu garum ning tum ra kadawn nga ai lam matut chye lu ai.
Comments