Pajau Media
9.10.2024
Myen hpyen dap gaw ya aten Jinghpaw Mung, Sam Mung sha n-ga amyu sha rawt malan hpung ni nga ai ginra de September shata laman kaw nna nbungli hku htim gasat ai lam laja lana galaw nga ai hta mara kata Mung masha asak si sum law ai sha n-ga Mung masha dum nta tsa kaba hten za nga ai lam chye lu ai.
Myen hpyen dap gaw amyu sha rawt malan hpung ni hpe “Asuya hpe rawt malan ai gumshem hpung” ngu masat nna laja lana htim gasat nga ai hta n seng n ang ai Mung masha law law asak si sum ra ai re. September shata laman hta Jet nbungli bawm hkrup mara jahkrat bun ai, lak nak kaba gap bun ai law dik ginra ni gaw Jinghpaw mung Hpakant, Sam Mung dingdung daw Lashu, Nam Hkam ginra ni hkan re lam mung chye lu ai.
Jinghpaw mung kata September 4 daram kaw nna Hpakant, Seng Tawng ginra de matut manoi htu shadut majan baw ai hta September 12 ya shani Hpakant Balik Dap hpe zing madu nna Seng Tawng Lucky Men Hotel kaw dap jung nga ai Myen hpyen dap hpe gaw September 7 ya kaw nna htim gasat ai hta October 8 ya hta gaw bawng masha marai 22 hte hpawn lak nak hpan hkum zing madu la lu sai re. October 9 shani du hkra ginra jasan bungli matut manoi shang ai hta bawng masha marai 3 hpe bai lu rim ai lam shawng lam shiga kaw na chye lu ai.
Myen hpyen dap gaw gasat gala majan zim nga ai aten raitim nbungli bawm jahkrat ai lam, lak nak kaba gap bun ai lam dingyang galaw nga ai majaw Hpakant ginra gasat gala majan laman nbungli bawm, lak nak kaba a majaw Mung masha marai 34 asak si sum ai lam, hkala hkrum ai marai 13 nga nna hpyen ninggang shatai nna rim woi da hkrum ai Mung masha mung nga ai sha n-ga Mung shawa dum nta 500 hkawt hten za hkrum ai lam mung chye lu ai.
Sam Mung dingdung daw ginra kata hta mung nbungli bawm a majaw Nam Hkam, Lashu ginra kata Ma hkum kanu ni, Ma kaji ni mung lawm yang marai 19 asak si sum nna hkala hkrum ai marai (50), Mung masha dum nta hten za ai mabyin 34 daram nga ai lam ginra shiga dap ni kawn tang madun shagrin da ai kaw na chye lu ai.
Myen hpyen dap gaw tat sum kau ai lamu ga ni bai lu hkra hpyen hte Mung masha hpe ginhka ai lam n nga hkrup mara htim gasat nga ai hta mara kata Mung masha law law asak si sum ra ai re mung chye lu ai. Ya aten rawt malan hpung ni shamu shamawt nga ai ginra ni hkan hpyen n-gun jat htim gasat ai lam ni laja lana galaw nga dingyang re hpe mung chye lu ai.
Comments