Pajau Media
9.9.2024
Gasat gala majan laja nga ai Hpakant ginra hta Myen hpyen dap gaw hpyen shamu shamawt nga dingyang re hte sanat hkrup mara gap shadam ai lam, lai wa lai sa mung masha ni hpe san jep jahkrit shama ai lam ni galaw nga ai hpe ginra masha ni tsun ai kaw na chye lu ai.
Myen hpyen dap gaw lai wa lai sa mung masha ni hpe san jep jahkrit shama ai gaw Seng Tawng “Lucky Men Hotel” shawng kaw rai nna Sep 7 ya shani hta mung Mung masha marai 3 hpe rim woi mat ai lam nga ai re hpe chye lu ai.Sep 7 ya shana daw kaw nna Myen hpyen dap gaw Seng Tawng “Lucky Men Hotel” shawng Manap gat kaw shara jahkrat nga ai rai nna Mung masha ni hpe san jep, jahkrit shama, sanat gap shadam nga dingyang re hpe mung chye lu ai.
KIA pawng hpawm hpyen hpung ni hte mung ang katut gasat gala majan byin ai hte Myen hpyen dap kawn lak nak kaba gap shadam ai majaw Mung masha dum nta kata de wa hkrat bun nna dum nta law law hten za hkrum ai lam na chye lu ai.
Seng Tawng ginra kata Sep 8 ya du hkra gasat gala majan laja nga dingyang re majaw ginra masha ni gaw kadai mung kadai chye ai hku hprawng koi yen nga sai lam, ya aten Seng Tawng ginra hta Myen hpyen n-gun 60 jan shamu shamawt nga nna hpyen masa laja nga dingyang re hpe mung chye lu ai.
Comments