Rim Hkrum Ai Sar Maw Ginra Masha Ni Yawng Bai Lawt Pru Wa Sai Lam

Pajau Media Channel

3rd April, 2024

Sar Maw ginra mare salang rim hkrum ai manghkang a majaw bawng malai hku rim hkrum ai Sar Maw ginra masha ni April (2) ya shani hkying (12:00) Aten daram hta yawng hpe dat ya sai re lam ginra masha langai tsun ai kaw na chye lu ai.

Mare salang rim hkrum ai kade n na ai hpang ICM nawku jawng wang kaw nna marai (30) jan hte lam hkan na mu mamu masha ni hpe rim woi mat ai ni yawng hte rai yang rim hkrum ai masha marai (50) hkawt rim hkrum ai hte ya aten yawng hpe dat ya sai re lam ginra masha tsun ai.

“Mani yawng lawt pru was ai. Yawng rai yang marai (20) jan daram re. Num daw hte num daw hku nna dat ya ai re. Shawng n nan numdaw hta marai (8)hte ngam ai ni hpe bai dat ya ai re,” nga nna ginra masha tsun dan ai re.

Sar Maw mare masha ni hpe Myen hpyen dap masat (105) dap dung kawn April (1) ya shani bawng malai hku nna rim woi mat ai re hte ya aten yawng ngu na daram lawt pru wa sai re. March (31) ya shani Sar Maw lawk lahkawng kaw nna mare salang wa hpe mying n chye lu ai hpung ni kawn rim woi mat ai shana daw hta Myen hpyen dap kawn mu mamu mung masha ni hpe jep joi rim ai lam ni galaw wa ai re. Rim hkrum ai mung masha ni hpe mare salang hpe bai mu yang dat ya na ngu tsun ai lam ni nga ai re.

Mare masha ni lapran na lu ai shiga gaw dai mare salang wa dap dung (105) de du wa sai lam ni tsun nga ma ai raitim Pajau Media kawn mung masha ni hpe matut mahkai sagawn yu yang mung masha ni kawn mung teng ai ngu tsun shagrin na matu yak ai masa re lam tsun wa ai re.

“Shiga gaw gara masa re ngu gaw atsawm n lu tsun ai. Nkau mi tsun ai hta mare salang wa gaw dap dung (105) de bai du taw sai lam tsun ai re, n dan nga shiga ni na ai majaw bai sagawn yu yang n re nga nna bai tsun wa ma ai."

Sar Maw mare masha ni hpe mare salang wa hpe rim woi mat ai mabyin hte seng nna mare salang wa lawt pru wa ai shaloi she dat ya na ngu tsun ai lam ni nga ai re hpe mung chye lu ai. Ya aten bawng malai hku rim hkrum ai mung masha ni hpe PCG kaw nna salang ni lapran tsap hparan ya ai hte lawt pru wa ai re lam ginra masha ni tsun ai re.