Pajau Media Channel
18th April, 2024
Myen shaning nnan shani hta myen mugndan kata htawng masha shalawt ai kaw KBC ningbaw Usa Rev. Dr Hkalam Sam Sun mung lawt pru wa ai raitim dai shana hkying 10 PM aten daram hta dum nta kaw na nan bai wa rim woi hkrum ai lam chye lu ai.
“Mana masha law law hpawng chyawm ai masa byin mat ai majaw shana hkying jahku jan daram kaw myen hpyen la ni shinggan bu hpun palawng hte sa woi mat ai, hpawt ni bai dat ya na nga rim woi mat ai re, ya aten du hkra n lawt pru wa shi ai” nga nna ni htep ai jinghku ni tsun ai kaw na chye lu ai.
Sara kaba gaw April 17 ya shana daw hkying 1:00 PM daram hta lawt pru wa ai raitim shana hkying 10:00 PM daram hta san jahkrup la ra ai lawng lam ni naw nga ai nga nna myen hpyen dap kawn shinggan bu hpun palawng ni hte sa wa nna rim woi mat ai re hpe mung chye lu ai. Sara kaba hte rau ningrum ningtau jan hte PCG kaw na lit nga ai salang mung lawm mat ai lam chye lu ai.
Rev Dr. Hkalam Sam Sun hpe Myen hpyen dap kawn lai wa sai 2022 ning Dec praw 5 ya shani Thai mungdan de tsi tsi hkawm la na matu Mandalay nbungli daru kaw nbungli jawn na aten hpe la nga yang rim hkrum ai hpang tara jewat nna htawng dam kru ning jahkrat hkrum ai re. Myitkyina htawng kaw laning mi hte shata mali sharen da hkrum ai kawn April 17 ya shani htawng masha shalawt ai kaw lawm wa ai raitim dai shana hta sha kalang bai rim woi hkrum ai re hpe mung chye lu ai.
留言