Pajau Media
25.10.2024
“Anhte shang lawt rawt malan hkrun lam gaw shaning 60 ning jan mat sai raitim anhte myit mada ra sharawng ai Mung masa pandung de garai nlu du nga ai, ya aten na masa gaw anhte hta nga ai atsam marai mahkra hte n gun dat ra ai aten rai sai, ya aten asak ram ai, n-gun ja ai Wa Ngan ni yawng ahkyak ai aten laman rawt malan ai magam bungli hta shang lawm sa wa ga.”
Ya aten Myen mungdan hta byin nga ai majan gaw Mung shawa yawng myit hkrum ai hte shang lawm ai rawt malan ai bungli hta asak ram ai Ramma Wa Ngan ni yawng mung rawt malan a magam bungli hta atsam dat shang lawm sa wa na lam, ya aten gaw ahkyak dik ai aten rai nga nna KIO/KIA Ningbaw Kaba Du Daju Jum Nban La kawn 64 Ning Hpring KIO Masat N htoi Mungga hta tsun shadut da ai lam na chye lu ai.
Myen mungdan ting shanglawm madi shadaw ai rawt malan hkrun lam re majaw Myen hpyen gumshem gaw teng sha hkrat sum na re, KIA gaw tinang hte pandung bung ai hpyen gumshem hpe rawt malan ai Wuhpung Wuhpawng ni hte ta gindun na matu daw dan da ai hte maren matut nna mung hkrang shapraw galaw sa wa na re lam mung tsun da ai re.
Myen hpyen dap a lagaw lata tai nna Myen hpyen magam bungli hta myit su myit rawt hte shang lawm garum nga ai ni hte P.T.Ts hpung ni hpe mung si mani ai ladat hte gahkyin gumdin lai wa sai hta n kau gaw dawm hkring mat ai lam nga ai zawn n kau gaw matut nna galaw nga ai hpe mu lu ai. P.T.Ts uhpung uhpawng ni mung tinang galaw nga ai bungli hpe dawm jahkring kau nna KIO hte masa lam langai sha kaw hkawm wa na matu mung ja ja tsun shadut da ai re hpe mung chye lu ai.
March 7 ya kaw nna hpang ai KIA pawng hpawm hpung ni a htu shadut htim gasat majan hpang Myen hpyen dap a dap shara 220 jan daram hpe zing madu da lu sai lam, ya aten zing madu da sai ginra ni hpe gaw sharawt magam bungli ni, KIO uphkang sai ru ni hte hkrang shapraw galaw nga sai lam mung chye lu ai.
Amyu kaba lailen hte dip up dip sha nga ai kata kaw na lawt lu na matu awng dawm shanglawt ai Mungdan gaw gap lu hkra ngu ai yaw shada lam hte shanglawt rawt malan hpang wa ai gaw October (25) ya shani shaning 64 ning hpring sai re. KIO masat n htoi lamang hpe Jinghpaw Mung kata hte KIO uphkang ginra shara shagu hta October 25 ya shani shaning shagu masat n htoi lamang ni galaw nga ai re hpe mung chye lu ai.
Comments