Putao Nam Htum Hku Ginra Kata Myen Hpyen Dap Shara Jahkrat Nga Ai Majaw Hkawm Sa Hkawm Wa Yak Hkak Wa Ai Lam

Pajau Media

April 17, 2025

Putao Muklum hte Nam Htum Hku ginra hpe matut da ai lam ntsa hta Myen hpyen dap shara jahkrat nga wa ai majaw Mung masha ni hkawm sa hkawm wa lam grai yak wa ai lam chye lu ai.

Nam Htum Hku ginra de Myen hpyen dap gaw 2024 shaning htum maga kaw nna shamu shamawt hpang wa ai re hte hkawm sa hkawm wa san jep n htawm shagyit dung wa ai re lam ginra masha tsun ai.

“Hk.L.Y (46) shara jahkrat wa dung ai aten n na shi ai. Shanhte wa dung ai hpang Nam Htum Hku mung mare masha ni myo de wang lu wang lang hkawm sa na matu yak mat sai, grai jep mat sai. Shawng de gaw jahpawt jau myo de manap gat hkan gat dut sa ai ni grai law ai, shana n sin sin tim hkawm sa mai ai, ya gaw n mai sai. Putao ginra na pyaw chyai ginra de sa hkawm na matu pyi jahpwt jau jep joi shara lai ra ai majaw shana yup ai hku hkawm sa yang sha mai sai,” nga nna ginra masha langai tsun dan ai re.

Nam Htum Hku mare ginra hta Mung masha htinggaw 400 grup yin shanu nga ai rai nna Putao ginra a sinna maga Putao muklum hte Deng 16 tsan ai shara kaw nga ai mare kaba langai re. Shaning shagu Nshung ladaw hta bu hkawm masha ni law law sa du ai Summwi Panglai chyai shara sa lam mung re hpe chye lu ai.

Ya aten dai lam de myen hpyen dap shara jahkrat nga ai hta lai wa lai sa ni hpe shagyit sin ai Myen hpyen la ni kawn hkap jahkring la nna shanhte sa mayu ai shara de wa sa shangun ai lam, hka ja shangun ai lam ni galaw shangun ai re hpe mung chye lu ai. Myen hpyen dap shagyit dung mat ai majaw ya aten Nam Htum Hku ginra masha ni wang lu wang lang hkawm sa na matu yak hkak mat ai re hpe mung chye lu ai.

Shiga- Mali Hku