Putao N bungli Pa Kaw P.T.Ts Hpung Ni Jep Joi Shara Jahkrat Dung Nga Ai Lam

Pajau Media Channel

30th January,2024

Putao ginra hta Myen asuya hpyen dap a lagaw lata tai shamu shamawt hkawm nga ai Tan Gu Tang P.T.Ts hpung ni gaw 2024 shaning n nan daw kaw nna ginra kata shamu shamawt lam dingyang galaw nga ai re hte Jan (27) ya kawn n bungli pa lawk lam maw kaba kaw shara jahkrat jep joi ai lam ni galaw nga ai re lam ginra masha ni tsun ai kaw na chye lu ai.

Ya na zawn mung masha pru shang htat ai shara kaw jep joi shara jahkrat wa ai majaw mung masha ni hkawm sa hkawm wa lam hta dut dang ai, myit shimlam n lu ai, ya na zawn Myo mare kata kaw shara jahkrat nga ai lam hpe mung masha ni nra sharawng ai, myit tsang lam law law re nga nna Myo de dingyang lai hkawm nga ai Machang Baw ginra masha langai ya na zawn tsun dan ai.

“Lai wa sai ten hta gaw nbungli pa makau grup yin hta gate dung ai lam n nga ai, n dai shara gaw myo le, kalang ta P.T.Ts hpung ni wa dung ai majaw myo de hkawm sa na matu grai yak wa ai, lai hkawm ai masha shagu hpe san jep ai, langai hpang langai dingren tsap ra taw ai, mawdaw la ni mung yu nna shiga jaw ra ai, shana n sin sin wa ai aten hkan grau yak ai ” nga n na tsun ai re.

Ya aten P.T. Ts hpung ni shara jahkrat nga ai shara gaw Nawng Mun, Hkawng Lang Hpu ginra hte Machang Baw hkran na mung masha ni myo de hkawm sa hkawm wa galaw ai madung lam maw kaba re majaw ya na zawn shara jahkrat ai lam gaw n byin ging ai nga nna Hkawng Lang Hpu ginra masha langai tsun ai re.

“Myen hpyen dap hte P.T.Ts hpung ni gumhpraw hta sha na matu sha galaw ai masing langai re, Nawng Mun, Hkawng Lang Hpu maga de mawdaw gau sha ai ni kaw nna shang gumhpraw tam sha mayu na galaw ai rai nga, Hkrun lam dingyang mung Gate grai lai ra sai, Nawng Mun-Magwi Za gate kaw ma, Hkawng Lang Hpu maga de mung Ri Dam gate hkan Mung grai gyip gyeng ai hku jep joi ai, n dai gaw Mung masha ni hpe da sang jam jau jaw taw ai she re ”.

Putao myo kaw Hpyen dap hte P.T.Ts pawng hpawm hpung lahkawng a gate lahkawng nga sai re, langai gaw Myitkyina-Putao pru shang shara Mu Lar Shi Di kaw shara jahkrat jep joi ai lam galaw nga ai sha n-ga mawdaw la ni hpe gaw gumhpraw hta ai lam, dingyang lai hkawm nga ai mung masha ni hpe gaw Cycle Tool Box ni hpaw jep joi ai lam ni dingyang galaw nga ai lam, arai ni hpaw hpyen jep joi ai lam dingyang galaw nga ai re.

Dai Gate ni hta shana hkying kru kaw nna jahpawt hkying kru du hkra hkawm sa ahkang pat tawn da ai re hte tsi rung tsi gawk ni de aten dep sa ra ai machyi masha ni nga wa yang shalai la na matu grai yak hkak ai re nga nna ginra masha ni tsun ai.

Shiga: Mali HKu