Pajau Media
28.1.2025
Ya aten Putao-Myitkyina hkawm sa hkrun lam mayan hta gasat gala majan n nga ai raitim jep joi shagyit grai law wa ai majaw hkawm sa hkawm wa lam hta yak hkaka wa ai lam chye lu ai.
Lai wa sai ten hta gaw Myitkyina-Putao lam shagyit 3, 4 daram sha nga ai raitim ya aten shagyit 20 daram hpe lai ra ai re lam Mawdaw la ni tsun ai re. Ya na zawn jep joi shagyit law wa ai majaw hkrun lam hkawm masha ni hpe htaw wa htaw sa galaw na pyi grai yak wa ai masa hpe Mawdaw la ni tsun ai re.
“Hkrun lam hkawm masha ni hpe kalang kalang htaw na matu mung n loi la ai. Putao byuha rung kaw nna madi shadaw laika la ya ra ai. Dai n lawm yang Sumpyi Yang mare kaw nna bai n htang shangun ai mung law law lang rai sai,” nga nna tsun ai re.
Myitkyina-Putao lam lapran na mare kahtawng shagu ngu na daram hta jep joi shagyit ni nga ai re hte kalang marang shagyit kaw dung nga ai ni tsa lu da nna Mung masha ni hpe san jep adup gayet ai madang pyi nga ai lam mung matut tsun ai re.
“Ya gaw mare kahtawng shagu ngu na daram hta gate (shagyit) nga ai. Kalang marang gate kaw nga taw ai ni tsa bri na grai jep ai. Sumpyi Yang hte Mu Lar Shi Di shagyit nga yang grau sawng ai. Hkrun lam hkwam Mung masha ni hpe adup gayet ai lam ni galaw ai. Myitkyina kaw na lung wa de rai yang gate hkan gumhpraw hta ai pyi sen shi jan daram ang ai, dai majaw Putao ginra kata gunrai manu n hkrat hkraw ai re.”
Ya aten Putao-Myitkyina lapran hkrun lam hkawm ai Mung masha ni grai yawm wa ai re hte nbungli lam hku sha hkawm sa ai ni law nga ai re lam chye lu ai. Ya aten Myitkyina-Putao sa nbungli lak mat gaw Sen Lahkawng jan du hkra tsaw nga ai re lam chye lu ai.
Shiga – Mali Hku
Yorumlar